“Командамды шешуші кезеңде жерге қараттым деп ойладым” - Месси ӘЧ матчіндегі пенальти туралы

2026 жылғы Әлем чемпионатының 1/8 финалындағы Аргентина мен Мысыр арасындағы матчтен кейін футболшы Лионель Месси жүзеге асыра алмаған пенальтиі туралы айтты.

Ойыншының айтуынша, ол қатты көңілі түсіп, командаға кесірім тиді деп ойлаған, бірақ кейін өз қатесін түзеп, бұған қуанышты болған.

"Пенальтиді орындай алмағаныма және оны ауыр қабылдағаныма қатты ашуландым. Сол сәтте командамды шешуші кезеңде жерге қараттым деп ойладым. Бірақ бақытымызға орай, тағдыр мен үшін ерекше сәт дайындап қойыпты. Мен камбэкке жол ашқан голды соқтым. Бұл біз үшін де, қайтадан трибунаға оралып, күн сайын аргентиналық болудың қандай мақтаныш екенін көрсетіп жүрген жанкүйерлер үшін де үлкен жеңілдік пен зор қуаныш болды. Мен өте бақыттымын", – деді Месси.

Аргентинаның Әлем чемпионатындағы камбэгі

1/8 финалда Аргентина құрамасы Мысыр командасын жеңіп, ерік-жігер танытты. Алғашқы екі голды мысырлық ойыншылар Яссер Ибрагим (15') және Мостафа Зико (67') соқты.

Алайда кейінірек, 79-минутта Кристиан Ромеро баспен гол соғып, Аргентинаның есеп айырмасын қысқартты. Тағы 4 минуттан кейін Лионель Месси айып алаңында пас алып, есепті теңестірді. Ал кездесу соңында Энцо Фернандес Лаутаро Мартинестің пасын сәтті пайдаланып, командасын алға шығарды.

Кездесудің қорытынды есебі — 3:2, Аргентина жеңіске жетті.

Осылайша, Аргентина құрамасы турнирдің 1/4 финалына жолдама алды. Әлем чемпионатының ширек финалында олар Колумбияны пенальти сериясында жеңген Швейцария құрамасына қарсы ойнайды. Матч 12 шілдеде өтеді.