Криштиану Роналду Португалия құрамасындағы іс-әрекеті үшін жазаланады

Фото: vitaliivitleo/depositphotos.com

Португалия құрамасы мен Сауд Арабиясының "Әл-Наср" клубының жұлдызды шабуылшысы Криштиану Роналду ұлттық команда орналасқан жерден рұқсатсыз кетіп қалғаны үшін 30 күнге шеттетіліп, айыппұл арқалайды, деп хабарлайды Tengri Sport.

Танымал футбол инсайдері Фабрицио Романоның мәлімдеуінше, 41 жастағы португалиялық шабуылшы 30 күнге ойыннан шеттетіледі, сондай-ақ 255 еуро көлемінде айыппұл төлеуге міндеттеледі.

Жазаға Роналдуның қыркүйек соңында құрама лагерінен өз бетінше кетіп қалуы себеп болған.

🚨🇵🇹 РЕСМИ: Криштиану Роналду 30 күнге шеттетіліп, 255 еуро көлемінде айыппұл арқалады. Мұндай шешімді Португалия федерациясы футболшының Даниядағы ұлттық құрама лагерінен кетіп қалуына байланысты қабылдады. Криштиану бұл әрекеті үшін кешірім сұрап, өзіне жаза тағайындауды ұсынған болатын. https://t.co/oXEXM4JaI7
— Fabrizio Romano (@FabrizioRomano) 19 қазан, 2026 жыл

Роналду мен Португалия құрамасы арасындағы жанжал

Криштиану Роналду мен Португалия құрамасының бас бапкері Жорже Жезуш арасындағы текетірес қыркүйектегі Ұлттар лигасының матчтері кезінде ушығып кетті.

27 қыркүйекте Норвегияға қарсы өткен ойында (2:1 есебімен жеңіс) құраманың 41 жастағы капитаны ұзақ уақыттан бері алғаш рет барлық 90 минут бойы қосалқы құрамда қалды.

Екінші таймда Жезуш Роналдуды жаттығуға жібергенімен, оны алаңға шығармады. Футболшының айтуынша, бапкер оған шамамен жарты сағаттық ойын уақытын беремін деп алдын ала уәде берген.

🚨🇵🇹 Жорже Жезуш Криштиану Роналдуның Норвегияға қарсы ойында не себепті қосалқы құрамда қалғаны туралы: "Мен Криштиануды алаңға шығаруды жоспарлағанмын... бірақ ойын барысы басқаша өрбіді". "Оны алаңға қосатын қолайлы сәт емес деп есептедім, алда әлі екі ойын бар, бірақ бұл оны физикалық тұрғыдан сақтау үшін жасалған жоқ. Ол дайын болатын".
— Fabrizio Romano (@FabrizioRomano) September 28, 2026

Жағдай бірнеше күннен кейін тіпті қиындай түсті. Даниямен өтетін матч (1 қазан) қарсаңында Роналду тағы да негізгі құрамға ілікпегенін білді. 30 қыркүйекте ол Копенгагендегі команда лагерінен өз бетінше кетіп қалды.

Кейіннен шабуылшы мәлімдеме жариялап, онда Жезушты берген уәдесін екі рет бұзды деп айыптады және бұл жағдайды "сенімге қиянат жасау" деп атады.

Instagram-дағы бұл жарияланымды көру

Cristiano Ronaldo (@cristiano) жарияланымы

Жезуш ойыншымен келісім болғанын жоққа шығарды, бірақ оның қайта оралуына мүмкіндік бар екенін аңғартты. Португалия Роналдусыз-ақ қалған екі матчте де жеңіске жетіп, топта көш бастады.

🎥🚨 Ертең Данияға қарсы өтетін матч алдындағы баспасөз мәслихатында Жорже Жезустың Криштиану Роналду туралы сұраққа берген жауабының толық нұсқасы... 🇵🇹🗣 Жорже Жезус: "Сұраққа жауап бермес бұрын, сөзімді бөле кеткім келеді. Мен үшін ең маңыздысы — Данияға қарсы ойындағы мақсатымыз. Бұл — қарсыласты құрметтеу. Біз Ұлттар лигасында жеңіс жолын жалғастыруды көздеген мықты қарсыласпен ойнаймыз. Менде тек бір ғана емес, 23 ойыншы бар, сондықтан кез келген ойыншы туралы сұрақ қоюларыңызға болады. Дегенмен, сұрағыңызға жауап берейін. Роналдуға келетін болсақ, бір сұрақ аз, үшеуі тым көп. Ол туралы тек екі сұраққа ғана жауап беремін, одан кейін бұл тақырыпты жабамыз. Себебі мен бұл жерге Роналду үшін келген жоқпын. Менің мұнда келуімнің басты себебі — Даниямен ойын және ұлттық құраманың бапкері екендігім. Енді нақты сұрағыңызға келсек. Менің есімде, бірақ қайталап жібересіз бе?" Журналист: "Бапкер Жорже Жезус Роналдумен оның алаңдағы уақыты туралы келісті ме және ол кеше ұлттық құрамамен жаттығудан бас тартты ма?" 🇵🇹🗣 Жорже Жезус: "Иә, онымен белгілі бір келісімге келгеніміз рас. Бірақ мен тек онымен ғана емес, Бруну Фернандешпен де жасағандай, арнайы жоспар құрдық. Мен Кришке Норвегия мен Данияға қарсы матчтарда ойнамайтынын айттым. Ол ойнамайды, өйткені бұл дұрыс шешім деп есептедім. Мен Кришпен бір жыл бойы жұмыс істедім. Мен ұлттық құрамаға үш ай бұрын келіп, онымен жаңадан танысқан жоқпын. Оның физикалық жағдайын жақсы білемін. Сауд Арабиясында бірге болғанда да осылай істейтінбіз. Ойындар әр үш күн сайын өткенде, Криш сирек шығатын. Оның үстіне, ол ойыннан кейінгі бірінші немесе екінші күні ешқашан жаттықпайды. Мүлдем. Бір жыл бойы солай болды. Сондықтан біз осылай келістік. Оған ойын алдында айттым, Португалиядағы алғашқы баспасөз мәслихатында ол да бұл туралы айтқан болатын. Ол бапкердің кез келген шешіміне, мейлі негізгі құрам болсын, мейлі қосалқы орындық болсын, дайын екенін жеткізді. Ол ешқашан бас тартқан емес, болған жағдай осы. Бірақ мен "60-минутта Карлуш Даниэлді, ал 70-минутта пәленшені шығарамын" деп алдын ала жоспарлап отыратын бапкер емеспін. Менің жұмыс стилім басқаша. Ойынның барысына қарай шешім қабылдаймын. Бастапқыда оны алғашқы екі ойынға шығармаймын деп келіскенімізбен, соңғы минуттарда оның көмегі қажет болар деп ойладым. Бірақ ойын ағымы басқаша өрбіді, сондықтан оны алаңға шығармадым. Шындық осы. Криш туралы айтқан соң, мынаны да қоса кетейін. Онымен бір жыл жұмыс істедім. Арамызда бір шиеленіс бар сияқты көрінуі мүмкін, бірақ ешқандай мәселе жоқ. Менің көптеген ойыншылармен келіспеушіліктерім болған, бірақ жоқ жерден мәселе шығармаңыздар. Бұл — бапкерлік шешім. Менде жоспар болды. Қаласаңыздар, Бруну туралы да айтып берейін. Норвегиямен ойында Брунуға да дәл солай айтқанмын. Бұл нені білдіреді? Бұл жоғарыда қойылған ойыншының мәртебесі туралы сұраққа жауап. Мәртебе — ол басқа нәрсе. Тәртіп бәріне ортақ. Алайда ойыншының мансабы мен жетістіктері бапкерге (кем дегенде менің жағдайымда) ойын алдындағы кейбір шешімдерде мұқият болуға мүмкіндік береді. Ойын басталған соң бәрі теңеседі. Шешімді бапкер қабылдауы тиіс. Менің ұстанымым осындай және мен әрқашан ойыншыларды құрметтей отырып, команда мүддесі үшін тиімді шешім қабылдаймын..." https://t.co/NuZ5k8oS9L
— The Nassr Tribune™️ (@AlNassrTribune) 2026 жылғы 30 қыркүйек

Халықаралық үзілістен кейін футболшы шешімін өзгертті: ол командаластары мен жанкүйерлерден кешірім сұрап, өз қателігін мойындады және кез келген жазаны қабылдауға дайын екенін мәлімдеді.