Өзбекстан құрамасының Әлем чемпионатындағы дебюті: қайда және қашан көруге болады?

Ертең, 18 маусымда, Өзбекстан құрамасы футболдан әлем чемпионатындағы алғашқы матчін өткізеді. Тарихи ойында Колумбия құрамасы қарсылас болады, - деп хабарлайды Tengri Sport.

Өзбекстан құрамасы әлем чемпионаттары тарихындағы алғашқы матчін Мехикодағы (Мексика) "Ацтека" стадионында өткізеді.

Ойын Қазақстан уақытымен сағат 07:00-де басталады.

Өзбекстанның алғашқы қарсыласы: не белгілі?

Колумбия құрамасы әлемдік біріншіліктердегі тәжірибесі жағынан анағұрлым мықты команда. Колумбиялықтар мундиальда алғаш рет 1962 жылы өнер көрсеткен, ал АҚШ, Мексика және Канададағы турнир олар үшін жетінші болмақ.

Команданың әлем чемпионаттарындағы ең үздік нәтижесі - 2014 жылғы ширек финал. Бразилиядағы турнирде олар топта бірінші орын алып, плей-оффтың алғашқы кезеңінде Уругвайды жеңді және алаң иелерінен ұтылып қалды.

Қазіргі команданың қоржынында 2024 жылғы Америка кубогының финалы мен өткен әлем чемпионатының іріктеу кезеңіндегі сәтсіздік бар. Сонымен қатар, оның құрамында әлемдік деңгейдегі жұлдыздар жеткілікті.

Мәселен, мюнхендік "Баварияның" сол қанаттағы вингері Луис Диастың құны Өзбекстан құрамасының бүкіл құрамының құнымен (85 миллион еуроға қарсы 70 миллион) тең десе болады.

Сондай-ақ, алдағы маусымаралық үзілісте топ-лигаға ауысатыны анық болып отырған португалиялық "Спортингтің" форварды Луис Суарес пен Ресей премьер-лигасында Әліп, Самородов, Кенжебек және Зайнутдиновке қарсы ойнап жүрген Джон Кордоба бар.

Колумбия құрамасының капитаны - "Реал" мен "Баварияның" бұрынғы жартылай қорғаушысы, Чемпиондар лигасының екі дүркін жеңімпазы Хамес Родригес.

Қазір ол америкалық "Миннесотада" өнер көрсетеді.

Колумбия - Өзбекстан: кездесулер тарихы мен болжам

Колумбия мен Өзбекстан құрамалары бұған дейін бірде-бір рет кездеспеген. Сонымен қатар, өзбекстандықтарға Оңтүстік Америка командаларымен ойын тарихи түрде қиынға соғады - жолдастық кездесулерде Уругвайдан жеңілген (0:3) және Венесуэламен тең ойын тіркелген.

ФИФА рейтингі де колумбиялықтардың пайдасына жығылады: команда қазір 13-орында болса, Өзбекстан небәрі 50-сатыда тұр. Көптеген сарапшы бұл матчте Колумбия командасының жеңісін болжайды.

Дегенмен, колумбиялықтардың әлем чемпионаттарында Азия құрамаларымен ойынында жағымсыз тәжірибесі бар. 2018 жылы олар Жапониядан 1:2 есебімен ұтылып қалған болатын.

Өзбекстан үшін тағы бір тиімді фактор ретінде стадионды атауға болады. "Ацтека" аренасы теңіз деңгейінен 2 мың метрден аса биіктікте орналасқан, бұл ауаның сейілуіне әкеледі. Бұл ойын қарқынына әсер етуі мүмкін, ал өзбекстандықтар үшін колумбиялықтардың жылдамдығы азайғаны тиімдірек.

Өзбекстан - Колумбия: тікелей трансляция

Өзбекстан құрамасының 2026 жылғы әлем чемпионатындағы алғашқы матчін Qazsport телеарнасы тікелей эфирде көрсетеді.

Трансляция Астана уақытымен 06:50-де басталады және телеарна сайтында тікелей эфирде көрсетіледі.