“Реал“ Жозе Моуриньо оралғаннан кейінгі алғашқы трофейін жеңіп алды

Фото: instagram.com/realmadrid/

Испаниялық "Реал Мадрид" "Депортивоны" жеңіп, 10-шы мәрте Тереза Эррера кубогының иегері атанды. Жалғыз гол қақпашының таңғажайып пасынан кейін соғылды, деп хабарлайды Tengri Sport.

Ла-Коруньяда (Испания) 1946 жылдан бері сарапқа салынып келе жатқан кубок үшін матч 12-сінен 13-іне қараған түні өтті.

Жеңіс голын "Реал" қақпашысы Андрей Луниннің жойқын пасынан кейін Браим Диас салды.

Айта кетейік, ойынға Килиан Мбаппе мен Джуд Беллингем қатыспады, алайда Винисиус Жуниор клубпен жаңа келісімшартқа отырғаннан кейін алғаш рет алаңға шықты.

Жозе Моуриньоның жаңа дәуіріндегі алғашқы трофей

"Депортивоны" жеңу "Реалға" португалиялық бапкер Жозе Моуриньо командаға оралғаннан кейінгі алғашқы кубогын сыйлады.

Көбіне алаң иелері жеңіп алатын бұл кубок өзінің алып көлемімен танымал. Әлеуметтік желі қолданушылары Тереза Эррера кубогының ішінен пәтер сатып алып, жайлы орналасуға болады деп әзілдеп жатыр.

Еске сала кетейік, Моуриньо футболдан әлем чемпионаты қарсаңында мадридтік "Реалды" басқаруға келіскен болатын. Португалиялық маман бұған дейін Мадридте 2010-2013 жылдар аралығында жұмыс істеп, каталлониялықтардан бірнеше жыл жеңілгеннен кейін клубқа Испания чемпионы атағын қайтарып берген еді.

Мадридтік "Реал" соңғы рет Ла Лига чемпионы атағын 2023/2024 маусымында жеңіп алды.

Бұған дейін франциялық "Пари Сен-Жермен" қатарынан екінші рет Еуропа Суперкубогын иеленді.