Рэпер мен экс-футболшының жекпе-жегі ауыр нокаутпен аяқталды: видео

Ресей құрамасының бұрынғы футболшысы Федор Кудряшов Fight Nights ұйымдастырған кикбоксинг турнирінде рэпер Дмитрий Goody Гусаковпен жекпе-жек өткізді, - деп хабарлайды Tengri Sport.

14 сәуірде Мәскеудегі (Ресей) Ирина Винер-Усманова атындағы гимнастика сарайында Fight Nights ұйымының кикбоксинг ережесі бойынша турнирі өтті.

Кештің басты айқасында рэпер Дмитрий Гусаков (Goody лақап атымен танымал) пен футболдан Ресей құрамасының бұрынғы қорғаушысы Федор Кудряшов кездесті.

Айта кетейік, қазіргі уақытта ол 2DROTS әуесқой футбол клубында ойнайды.

Жекпе-жек екінші раундта аяқталды. Гусаков лоу-киктер және бастан жасалған соққылар сериясымен қарсыласын тығырыққа тіреді, кейін оң аяқпен жойқын хай-кик жасап, Кудряшовты есеңгіретіп тастады.

Федор Кудряшов деген кім?

Федор Кудряшов - ресейлік футболшы, Ресей құрамасының бұрынғы ойыншысы, сол қанаттағы қорғаушы позициясында ойнаған.

Ол өзінің кәсіби мансабын 2003 жылы "Сибиряк" клубында бастап, 2005 жылы мәскеулік "Спартакқа" ауысты. Онда бірнеше маусым өткізіп, негізгі құрамда жүріп, "Химки", "Томь" және "Краснодар" клубтарына жалға ойнады. Кудряшов "Терек" (қазіргі "Ахмат") сапында тұрақты ойнап, 70-тен аса матч өткізді, кейін "Ростов" пен "Рубин" клубтарында жақсы қырынан көрінді.

2019 жылы Кудряшов алғаш рет шетелде бағын сынап, түріктің "Истанбул Башакшехир" клубында ойнады, кейін "Антальяспорда" ұзақ уақыт тұрақтап, 100-ге жуық матч өткізді. Ресейге оралған соң "Сочи" мен воронеждік "Факел" сапында өнер көрсетті.

2016-2021 жылдар аралығында Федор Ресей құрамасы сапында 48 матч өткізіп, 2018 жылғы өз еліндегі әлем чемпионатына (төрт матчта алаңға шықты), Конфедерациялар кубогына, Еуро-2020 және Ұлттар лигасына қатысты. Ресей чемпионатының төрт дүркін күміс жүлдегері атанды және Түркия Суперлигасының күмісін иеленді.