+7 (777) 001 44
99
Парижде 2026 жылғы Франция ашық чемпионатының алғашқы финалы аяқталды. Аралас жұптық (микст) бәсекеде италиялық Эррани/Вавассори жұбы мен Канада-АҚШ дуэті Дабровски/Кинг трофейді сарапқа салды, деп хабарлайды Tengri Sport.
Жарыстың бірінші нөмірлі жұбы болып тіркелген италиялықтар алғашқы сетте күтпеген жерден 4:6 есебімен есе жіберді.
Екінші сетте фавориттер тізгінді қолға алып, партияны 6:3 есебімен өз пайдасына шешті. Титул тағдыры чемпиондық тай-брейкте шешілді.
Шешуші кезеңде Сара Эррани мен Андреа Вавассори 10:4 есебімен жеңіске жетіп, чемпион атанды.
Айта кетейік, Сара Эррани мен Андреа Вавассори 1/4 финалда Қазақстан-АҚШ дуэті Анна Данилина мен Джеймс Трейсиді жарыс жолынан шығарып жіберген болатын. Сонымен қатар италиялық жұп өткен жылы да "Ролан Гарроста" топ жарған еді.
Микст - 2026 жылғы "Ролан Гарроста" жеңімпазы анықталған алғашқы бағдарлама болды. Алда ерлер мен әйелдер арасындағы жұптық және жекелей сындардың шешуші матчтері күтіп тұр.
Instagram-дағы бұл жарияланымды көру
Қазақстан "Ролан Гаррос" жеңісі үшін күресті жалғастырады
Айта кетейік, қазақстандық Анна Данилина аралас жұптық сыннан шығып қалса да, әйелдер арасындағы жұптық бәсекеде күресті жалғастырады. Сербиялық Александра Круничпен бірге ол ертең өтетін жартылай финалға жолдама алды.
Жекелей сында қазақстандық спортшылардың ешқайсысы турнирдің екінші аптасына өте алмады.
Ролан Гаррос - Францияның теннистен ашық чемпионаты. Әлемдік турдағы ең көне әрі беделді турнирлердің бірі. Ол "Үлкен дулыға" сериясына кіреді. 2026 жылы "Ролан Гарростың" барлық санат бойынша жалпы жүлде қоры 61 миллион 723 мың еуроны құрады.
