“Роналду - балласт“: Португалия құрамасының жұлдызы сынға жауап берді

Португалия құрамасының жұлдызды форварды Криштиану Роналду 2026 жылғы Әлем чемпионатындағы матчте дубль жасағаннан кейін өзіне бағытталған сынға жауап берді, - деп хабарлайды Tengri Sport.

Португалия құрамасының Конго ДР-ға қарсы алғашқы матчінде Роналду нәтижелі іс-қимылдарымен көзге түсе алмаған соң, жаппай сынға ұшыраған болатын. Алайда Өзбекстан ұлттық құрамасымен болған келесі кездесуде ол жағдайды түзеп, дубль авторы атанды.

Футболшы өзінің бұл спортта көптен бері жүргенін және сын мен өшпенділікке қалай төтеп беру керек екенін білетінін мәлімдеді.

"Бұл оңай апта болған жоқ. Әсіресе маған бағытталған сын өте ауыр болды. Бірақ футболдағы 23–24 жылдан кейін мен бұны қалай қабылдау керек екенін білемін. Ең бастысы - команда, ауызбіршілік және отбасымның қолдауы, өйткені бұл біздің бақылауымыздағы дүниелер. Қалғаны бізге байланысты емес. Нашар ойнаған кезде бізді, әсіресе мені әрдайым сынайтынын білеміз. Бірақ, айтып өткенімдей, мен бұған үйренгенмін", - деп Роналдудың сөзін келтіреді ФИФА.

Өзбекстанмен болған матчтен кейін португалиялық жұлдыз бірегей рекорд иесі атанды. Ол футбол тарихында алты бірдей Әлем чемпионатында гол соққан алғашқы футболшы болды.

Роналду жеке жетістігіне қуанышты екенін, бірақ басты мақсат - командасының жеңісі деп санайтынын айтты.

"Әлем чемпионатында гол соғу - әрқашан ерекше сезім. Біз алдыңғы матчтегі жағдайға жауап бергіміз келді және бұл нәтижеге өте қуаныштымыз. Жеке рекордтар - әрине жағымды, бірақ басты мақсат әрқашан құраманың алға қойған мақсаттарына жетуіне көмектесу", - деп толықтырды футболшы.

Айта кетейік, Криштиану Роналду тек футбол жанкүйерлерінің ғана емес, сонымен қатар сарапшылар мен журналистердің де сынына ұшыраған болатын.

Мәселен, танымал француз журналисі Даниэль Риоло Португалия құрамасының жұлдызы мен ұлттық құрама бапкері Роберто Мартинестің құзыреттілігіне күмән келтірді.

Ол Роналдуды "артық жүк" деп атап, бапкерді өз жұмысын атқара алмай отыр деп айыптады.

Еске салайық, қазіргі уақытта Португалия құрамасы өз тобында 4 ұпаймен екінші орында тұр. Олар 2026 жылғы Әлем чемпионатының плей-офф кезеңі алдындағы соңғы ойынын 28 маусымға қараған түні Колумбия құрамасына қарсы өткізеді.