Сенсация жасаған команда ойыншысы ӘЧ-2026 үздік голы үшін жүлдені жеңіп алды

Кабо-Верделік футболшы айып алаңының сызығынан допты иіре теуіп, қақпаның алыс бұрышына керемет гол салды.

Кабрал бұл голымен овертаймның 103-минутында қазіргі әлем чемпиондарымен есепті теңестірді, бұл голдың маңызын одан ары арттыра түсті.

"Басымды көтеріп, доптың жоғарғы бұрышқа ұшып бара жатқанын көргенде: "О тоба, мен не істеп қойдым?" деп ойладым. Өз көзіме өзім сенбедім. Командаластарыма қарасам - бәрі басын ұстап, қуаныштан естері шығып айқайлап жатыр екен. Ештеңе ойламастан жүгіре жөнелдім.

Кейін әлем чемпионатында ғажайып гол соққанымды түсіндім. Әлем чемпионатында гол соғу - кез келгеннің арманы, ал осындай үлкен аренада, осындай мықты командаға қарсы осылай гол салу - бұл керемет еді. Мен шын мәнінде бақытты болдым", - дейді жеңімпаз ұйымның баспасөз қызметіне берген сұхбатында.

Еске сала кетейік, бұл гол Кабо-Верденің келесі кезеңге өтуіне көмектесе алмады. 111-минутта Ромеро Мессидің бұрыштамадан асырған добын басымен қақпаға бағыттап, матч Аргентинаның 3:2 есебімен жеңісімен аяқталды.

Кабо-Верде - әлем чемпионатының басты сенсацияларының бірі

Айта кетейік, Кабо-Верде құрамасы 2026 жылы әлем чемпионатында дебют жасап, топтық кезеңде бірде-бір рет жеңілмей, бірден плей-оффқа шыға алды.

Аралдықтар алғашқы сенсацияны бастапқы матчте-ақ жасап, болашақ әлем чемпиондары - испандармен тең ойнады (0:0). Олардан негізгі уақытта гол өткізбеген келесі команда Аргентина құрамасы болды.

Кездесудің басты кейіпкері және турнирдің басты жұлдыздарының бірі Кабо-Верденің 40 жастағы қақпашысы Возинья болды. 2026 жылғы Әлем чемпионатынан кейін оның Transfermarkt-тағы құны 10 есеге өсіп, чилилік "Коло-Коло" клубы өзгелерден бұрын қақпашымен келісімшартқа отырып үлгерді..

Бұған дейін әлем чемпионаттары тарихындағы үздік сұрмерген, "Реал" мен Франция құрамасының шабуылшысы Килиан Мбаппе ұлттық құрама жанкүйерлеріне ашық хат жариялаған болатын.