+7 (777) 001 44
99
ӘЧ-2026 финалына шығу үшін аргентиналықтардың ағылшындармен кездесетіні белгілі болған бойда, күн тәртібінде қос ел арасындағы даулы аумақтарға қатысты қайшылық қайта бой көтерді.
Ойын қарсаңында Аргентина Сыртқы істер министрі Пабло Кирно Фолкленд аралдары тақырыбында эссе жариялады. Оның айтуынша, аралдардың көптен бері ағылшын аумағы екеніне қарамастан, оларды Аргентинаның басқаруына өткізу мәселесі қайта көтерілуі тиіс.
Фолкленд аралдарының тарихы және оның футболға қатысы қандай?
Англия мен Аргентина арасындағы аумақтық дауға байланысты текетірестің басталғанына 200 жылға жуықтады.
Қақтығыс мәні неде?
Аргентина ресми тұлғалары 1833 жылы Біріккен корольдік ел жағалауынан 480 шақырым жердегі Мальвин аралдарын (аумақтың Аргентинадағы атауы) күшпен басып алып, сол жердегі билікті қуып жіберді деп есептейді.
Арада 130 жыл өткенде - 1965 жылы БҰҰ Бас Ассамблеясы бұл аумақтарды даулы деп танып, олардың мәртебесі бойынша Аргентина мен Англия арасында келіссөздер бастауға бастамашы болды. Алайда 1982 жылы аргентиналықтар архипелагты күшпен қайтарып алуға тырысты.
Аргентина мен Ұлыбритания арасындағы қарулы қақтығыс 74 күнге созылып, оңтүстік америкалықтардың жеңілісімен аяқталды. Соғыс кезінде 649 аргентиналық және 255 британдық әскери қызметші қаза тапты.
2013 жылы аралдарда референдум өткізіліп, тұрғындардың 98 пайызы аралдардың Ұлыбританияның теңіздің арғы жағындағы аумағы мәртебесін сақтап қалуын жақтады. Бірақ БҰҰ мен Аргентина бұл нәтижені мойындамады, себебі ол халықаралық ұйымдардың қатысуынсыз, тек ағылшындардың бастамасымен өткізілді.
"Құдайдың қолы" - Фолкленд аралдары үшін кек алу
Футбол 74 күндік қақтығыстан әлдеқайда бұрын Англия мен Аргентина қарым-қатынасының бір бөлігі болған.
1966 жылы ағылшындар өз жерінде өткен Әлем чемпионатының 1/4 финалында аргентиналықтарды жеңіп, оңтүстік америкалық құраманың капитаны Антонио Раттин түсініксіз себеппен алаңнан қуылды. Ол алаңнан шығып бара жатып, патшайымға арналған кілемшеде бірнеше минут отырып алды, бұл әрекет БАҚ-та арандатушылық ретінде қабылданды.
Бірақ бұл текетірес тарихындағы ең есте қаларлық матч Фолкленд қақтығысынан кейін болды. 1986 жылы командалар тағы да 1/4 финалда кездесіп, Диего Марадона ойын тарихындағы ең әйгілі екі голды соқты: біріншісін қолмен, екіншісін керемет жеке дара өтуден кейін.
Марадонаның бірінші голды қолмен соққанын төрешіден басқаның бәрі көрді. Матчтен кейін Диего бұл әрекетін ашық мойындап, гол "сәл Марадонаның басымен және сәл Құдайдың қолымен" соғылғанын мәлімдеді.
Сол кездесудегі аргентиналықтардың жеңісі әлі күнге дейін соғыстағы жеңіліс үшін символдық кек қайтару ретінде қарастырылады.
Жанкүйерлерге матч кезінде Фолкленд аралдарын атауға тыйым салынады
Көптеген мәлімдеме мен тарихи астарға байланысты Әлем чемпионатының жартылай финалындағы Аргентина - Англия матчін ұйымдастырушылар қауіптілігі жоғары ойын деп таныды.
Ойындағы күзетшілер саны мың алты жүз адамға дейін көбейтілді, ал Аргентинаның Қауіпсіздік министрлігі жанкүйерлер тарапынан аралдар тақырыбына қатысты ешқандай демонстрация болмауы керектігін баса айтты.
"Мальвин аралдары Аргентинаға тиесілі деп мәлімдеу - саяси үндеу, сондықтан зорлық-зомбылықты өршітпеу үшін мұндай демонстрациялардың болмауына келістік", - деп келтіреді Аргентина қауіпсіздік министрі Алехандра Монтеоливаның сөзін РИА Новости.
Соған қарамастан, матчтің арандатушылықсыз өтуі екіталай. Аргентина құрамасының ойыншылары Англиямен кездесетін жартылай финалға шыққаннан кейін: "Мальвин үшін, Диего үшін, Леоның матчі үшін" деп ұрандатты. Олар кездесу нәтижесіне қарамастан бұл тақырыпқа қайта оралатыны анық.
Толық мәтіні: «Мальвин үшін, Диего үшін»
— Ochoita (@OchoitaSoy) 8 шілде, 2026 жыл
Мен құрама жанкүйерімін
Оған шын жүректен қолдау көрсетемін
Лионельмен үшінші мәрте жеңіске жеттік
Тағы да чемпион болғымыз келеді
Арада 32 жыл өткен соң
Скалонета кек алады
Оныншы нөмірден ұрланған Кубок үшін
Бізге көтеруге рұқсат етпеген Кубок үшін
Мен көргім келеді...
Әлем чемпионатының жартылай финалы
Еске сала кетейік, Әлем чемпионатының финалына жолдама беретін Аргентина - Англия матчі Қазақстан уақытымен 16 шілдеге қараған түні өтеді.
Жеңімпаз финалда Испания құрамасымен бас жүлдеге таласады.
Instagram-дағы бұл жарияланымды көру
“Мессидің сүйіктісі“: ағылшындар ӘЧ жартылай финалына тағайындалған төрешіге наразылық білдірді
“Жылауық сияқты“: Франция құрамасының бапкері Испаниямен ойындағы төрешілік туралы пікір білдірді
Аргентина матч үшін миллиондаған доллар талап етті: жаңа дау шықты
