Волкановскидің айтуынша, Царукян жеңіл салмақтағы титул үшін таласуға әлдеқашан лайық болған, алайда қазіргі белбеу иегері Джастин Гэтжи оның шақыруын қабылдамай жүр.
"Мен адамдарды мүмкіндігінен айыруға тырыспаймын. Арман титул үшін жұдырықтасуы керек деп есептеймін! Егер мен жеңіл салмақта чемпион болсам, онымен 100 пайыз жекпе-жекке шығар едім. Егер Гэтжи мұны қаламаса, мен өзім істеймін!" - деді ол сұхбатта.
Волкановски мұндай жекпе-жек үшін жартылай жеңіл салмақтағы белбеуінен бас тартуға дайын екенін жеткізді.
"Мен жартылай жеңіл салмақтағы белбеуді тапсырып, Арманмен титул үшін төбелесемін, бітті. Бұл мені Гэтжимен жекпе-жектен де бетер рухтандырады", - деп атап өтті ол.
Айта кетейік, өткен демалыс күндері Әбу-Дабиде өткен UFC турнирінде Волкановски 32 жастағы ресейлік Мовсар Евлоевты мансабында алғаш рет жеңіліске ұшыратты. Бұл жеңіс австралиялық үшін рекорд (тоғызыншы) титулды қорғау болды. Бұл салмақта әлі ешкім белбеуін мұнша рет қорғап көрген емес.
UFC-дің жеңіл салмағында не болып жатыр?
UFC-дің жеңіл салмақтағы қазіргі чемпионы америкалық Джастин Гэтжи бұл титулды Ақ үйде өткен турнирде Илия Топуриямен жекпе-жекте жеңіп алған. Титул иегері 37 жаста және ол белбеуін қорғай ма, жоқ па әлі білмейтінін айтқан. Ол белбеуді босатуы мүмкін, бұл жағдайда титул бос қалады.
Бүгінде титулға негізгі үміткерлер: Гэтжиден жеңілген бұрынғы чемпион Топурия, одан кейін қыркүйекте Маурисио Руффиді сенімді түрде жеңіп, рейтингте екінші орында тұрған Царукян. Олардан кейін кезекте бұрынғы чемпион Чарльз Оливейра тұр.
Бұл ретте Оливейраның Диего Лопеске қарсы жекпе-жегі белгіленіп қойған, бұл кездесу оны титулға жақындатуы немесе керісінше алшақтатуы мүмкін. Ал Топурия мен Царукянның қарсыластары әзірге белгісіз.
Осылайша, егер Джастин расында белбеуді қорғаудан бас тартса, ал UFC бос қалған титул үшін Топурия мен Царукян арасында жекпе-жек өткізбеу туралы шешім қабылдаса, Волкановскидің сценарийі жүзеге асуы әбден мүмкін.
“Оны бақылап жүріңіздер“: UFC жұлдызы “Барселонадағы“ қазақстандық туралы айтты