+7 (777) 001 44
99
31 жастағы спортшының айтуынша, ол үлкен қателік жасап, өзіне көңілі толмай қалған.
"Мұны бірінші болып менен естігендеріңізді қаладым. Жақында Майоркада допинг-тест тапсырып, нәтижесінде кокаин табылды. Мен үлкен қателік жібердім және ол үшін жауапкершілікті толық өз мойныма аламын.
Жанкүйерлерімнен, отбасымнан, демеушілерімнен және жақындарымнан кешірім сұраймын. Ең алдымен, мені үлгі тұтатын балалардан кешірім өтінемін. Қандай үлгі көрсетіп жүргенімді білемін және өзім үшін қатты ұяламын. Өзімді ақтамаймын, бірақ қазіргі жағдайым туралы айтып бергім келеді", - деді ол.
Кирьос жарақаттарға байланысты туындаған қысымға төтеп бере алмағанын және мансабының аяқталуға жақын екенін қабылдау қиын болғанын айтты.
"Кейінгі бірнеше жылдағы жарақаттар маған физикалық және моральдық тұрғыдан қатты әсер етті. Денем ойымдағыны іске асыра алмайтын күйге жетті, ал мансабым аяқталып жатқанын қабылдау мен ойлағаннан әлдеқайда қиын болып шықты.
Мен әрқашан теннисті мен емес, теннис мені таңдады деп айтатынмын. Бірақ бүкіл өмірімнің мәні болған іспен қоштасу - мен кездестірген ең ауыр сынақтардың бірі. Кейде өзімді дәрменсіз әрі жалғыз сезіндім. Бірақ бұның ешқайсысы жасаған ісімді ақтамайды", - деді ол.
Кирьосқа қандай жаза қолданылады?
Теннистегі келеңсіз құбылыстармен күрес жөніндегі тәуелсіз орган (ITIA) Кирьостың лицензиясы 4 тамыздан бастап тоқтатылғанын хабарлады. Дисквалификация мерзімі қанша болатыны әзірге белгісіз, бірақ ұйым мәлімдемесінде жаза допинг қолданғанға қарағанда жеңілірек болатыны атап өтілген.
"31 жастағы Кирьос 2026 жылғы 22 маусымда Испанияның Майорка қаласында өткен ATP 250 турнирі кезінде сынама тапсырды. 2026 жылғы 17 шілдеде Дүниежүзілік антидопинг агенттігі (WADA) аккредиттеген зертхана кокаин метаболиті - бензоилэкгонин бар екенін растады.
Кокаин - WADA-ның тыйым салынған тізіміне енгізілген стимулятор әрі есірткі заты және Теннис бойынша антидопингтік бағдарламаға сәйкес жарыстарда қолдануға тыйым салынған. Жарыстан шеттету жағдайында есірткі заттарына тән жеңілдетілген санкциялар қолданылады", - делінген мәлімдемеде.
Қазақстандық теннисшімен дос және Уимблдон финалында ойнаған: Ник Кирьос туралы не белгілі?
Аустралиялық теннисшінің мансабы 2016 жылы шарықтау шегіне жетті - ол кезде Кирьос әлемдік рейтингте 13-орында тұрған еді.
Бұл ретте ол Үлкен дулыға турнирлеріндегі ең үлкен жетістіктеріне 2022 жылы қол жеткізді: Уимблдонның жекелей сынында финалға дейін жетіп, жұптық сында Australian Open жеңімпазы атанды.
Айта кетейік, Кирьос Қазақстанның бірінші ракеткасы Александр Бубликпен достық қарым-қатынаста. Олар ресми турнирлерде, соның ішінде кейінгі Уимблдонның бірінші айналымын қоса алғанда, бес рет жұптық кездесу өткізген.
Instagram-дағы бұл жарияланымды көру
Былтыр Александр Бублик Ник Кирьоспен подкаст жазып, онда олардың ұқсастықтары мен даулы мінез-құлқын талқылаған болатын.
Сол жерде қазақстандық спортшы Кирьостың көрермен алдында және оңашада өзін мүлдем басқаша ұстайтынын айтып берді.
"Біз жұптық сында ойнадық, сен жаттығуға кешігіп келдің. Мен сені кортта күтіп тұрдым, трибуналар лық толы еді, мен саған: "Неге кешігіп жүрсің?" деген сияқты бірдеңені қаттырақ дауыспен айттым.
Сол сәтте сен бірден бұрылдың, түрің өзгеріп кетті де: "Мені күте тұрсаң қайтеді, ойын небәрі 20 минут болады, сосын сен Уимблдонның төртінші айналымынан ұшып кетесің" дедің де, жағдайды ушықтыра бастадың.
Мен не болып жатқанын, маған неге бұлай сөйлеп тұрғаныңды түсінбедім. Кейін сен қатты сөйлей бастадың, бәрі күле бастады. "Қане, допты ұр, сен менімен біргесің, мен мынаны істеймін, ананы істеймін. Менің Роджермен бәсекелестігім бар, сондықтан бөгет жасамай тұр" дедің. Сен осыған жабысып алдың, бұл менің ашуыма тиді", - деді Александр.
Алайда, олар оңаша қалған бойда Кирьостың мінез-құлқы бірден өзгерген.
"Кейін біз алаңдағы орнымыздық ауыстырды, адамдар бізді көрмейтін жерде сен қасыма келіп: "Кешір, достым, кешігіп қалдым. Қызыммен бос болмадым, көшуге заттар жинадық" дедің. Сонда мен: "Түсінікті, мұның бәрі шоу болған екен ғой" деп ойладым. Мен бұлай істей алмаймын, істегім де келмейді. Менің болмысым ондай емес", - деді қазақстандық.
Сонымен қатар Кирьостың психологиялық қиындықтары болғаны белгілі - ол матчтер кезінде төрешілермен және қарсыластарымен жиі жанжалдасады.
2021 жылы оның бұрынғы сүйіктісі Кьяра Пассари теннисшіні тұрмыстық зорлық-зомбылық көрсетті деп айыптады. 2022 жылдың желтоқсанында Канберра соты спортшыны кінәлі деп таныды, бірақ бас бостандығынан айырумен байланысты жаза қолданған жоқ.
Әлемдік рейтингтегі бірінші орынға талас: Рыбакина мен Соболенконың келесі матчтері қашан өтеді?
