Әлемдік рейтингтегі бірінші орынға талас: Рыбакина мен Соболенконың келесі матчтері қашан өтеді?

Фото: © Tengrinews.kz / Турар Казангапов//depositphotos.com/ogfoto@yahoo.es

Беларусь өкілі, әлемнің бірінші ракеткасы Арина Соболенко Цинциннатидегі (АҚШ) турнирдің 1/16 финалында қытайлық Синьюй Ванды жеңіп, әлемдік рейтингте қазақстандық Елена Рыбакинадан басымдығын сақтап қалды, деп хабарлайды Tengri Sport.

Соболенконың матчтері

Үшінші айналымдағы матч бір сағатқа жетпейтін уақытқа созылып, беларусьтік теннисшінің екі сеттегі (6:1, 6:3) сенімді жеңісімен аяқталды.

Келесі кезеңде ол турнирдің басты сенсацияларының бірі - 20 жастағы чехиялық Сара Бейлекпен кездеседі.

Жарыс барысында ол өз елінің тәжірибелі теннисшілері Каролина Плишкова мен Барбора Крейчикованы қатардан шығарды. 1/16 финалда Бейлек күтпеген жерден ресейлік Екатерина Александрованы жеңді, ал Александрова бұған дейінгі ірі турнирде Арина Соболенконы жарыс жолынан шығарған болатын.

Instagram-дағы бұл жарияланымды көру

Арина Соболенконың (@arynasabalenka) жарияланымы

Соболенконың жеңісі WTA рейтингіне қалай әсер етті?

Әрбір келесі жеңіс Соболенконы кем дегенде US Open аяқталғанға дейін әлемдік рейтингтегі бірінші сатыны сақтап қалуға жақындата түседі.

Қазіргі уақытта рейтингтің лайв-нұсқасында Арина Елена Рыбакинадан 529 ұпай алда тұр. Бұл ретте қос спортшы да Цинциннатидегі бас жүлде үшін күресті жалғастырып жатыр.

Әлемдік рейтингте беларусьтік спортшыны басып озу үшін Елена Рыбакинаға Соболенконың финалға дейін жеңілгені қажет. Соболенконың қай кезеңде тоқтауына байланысты, қазақстандық теннисшіге бірінші орынға шығу үшін финалға дейін жету де жеткілікті болуы мүмкін.

Сонымен қатар егер финалдық матчте Арина Соболенкомен кездесетін болса, тіпті турнирдегі жеңіс те Рыбакинаның әлемдік рейтингте көш бастауына кепілдік бермейді.