Ламин Ямаль “Барселона“ Чемпиондар лигасынан шығып қалғаннан кейін марапатқа ие болды

Каталониялық "Барселона" мен Испания құрамасының жұлдызы Ламин Ямаль жаңа марапатқа ие болды. Ол Laureus World Sports Awards нұсқасы бойынша "Жылдың үздік жас спортшысы" атанды, деп хабарлайды Tengri Sport.

Испаниялық вингер "спорттық Оскар" аталатын бұл марапатты екінші жыл қатарынан алып отыр. Былтыр Ямаль "Жыл серпілісі" номинациясында жеңіске жеткен болса, биыл ол үздік жас спортшы деп танылды.

"Осынау марапатқа ие болғаныма өте қуаныштымын. Бұл - үлкен мәртебе. Академияға, отбасыма, үйде інімнің қасында отырған анама, әкеме, әжеме, әріптестеріме және әрдайым қасымнан табылатын командама алғыс айтқым келеді..." - деді вингер марапаттау рәсімінен кейін.

Ямальдан бөлек, сыйлық иегерлері қатарында "Формула-1" шабандозы Ландо Норрис ("Жыл серпілісі"), сондай-ақ теннисшілер Карлос Алькарас пен Арина Соболенко (жылдың үздік спортшылары) бар.

Өткен маусымда Чемпиондар лигасын жеңіп алған франциялық "Пари Сен-Жермен" жыл командасы болып танылды.

Ламин Ямаль феномені

Еске сала кетейік, Испания құрамасының 18 жастағы вингері 2024 жылы футболдан Еуропа чемпионатындағы өнерінен кейін танымал болды. Ол турнирдің барлық матчінде алаңға шығып, команда жетістігінің негізгі авторлары біріне айналды.

Сонымен қатар ол Чемпиондар лигасы, Еуро және басқа да турнирлердің ең жас ойыншысы ретінде көптеген рекорд орнатты. Биыл ол "Барселонаға" Испания Суперкубогын жеңіп алуға көмектесіп, командасымен бірге чемпионатта көш бастап тұр.

Бұл ретте 2025/2026 маусымында "Барселона" кубоктық жарыстарда мадридтік "Атлетикодан" екі рет жеңіліп, жарыс жолынан шығып қалды - алдымен Испания кубогында, кейін Чемпиондар лигасында.

Ламин Ямаль команда сапында барлық турнирде 44 матч өткізіп, 23 гол соқты және 16 нәтижелі пас берді.