19 жастағы вундеркинд Рыбакинаның “басты қаупіне“ айналды: әлемдік тәж үшін жаңа тартыс

Фото: ogfoto@yahoo.es/depositphotos.com//© Tengrinews.kz / Тұрар Қазанғапов

Ресейлік Мирра Андреева WTA Қорытынды турнирінде жеңіске жетіп, Елена Рыбакинаға 293 ұпайға дейін жақындады. Теннис комментаторы әрі сарапшы Андрей Пак Tengri Sport-қа берген сұхбатында жас қарсыластың қазақстандық спортшыны басып озып, әлемнің бірінші ракеткасы атану мүмкіндігін талдап берді.

Индиан-Уэллстегі (АҚШ) Қорытынды турнирде 19 жастағы Андреева барлық бес матчте жеңіске жетті, оның ішінде әлемнің бұрынғы бірінші ракеткасы беларусьтік Арина Соболенконы да қапы қалдырды. Финалда Мирра украиналық Элина Свитолинаны жеңіп, мансабында алғаш рет Қорытынды турнирдің жеңімпазы атанды.

"Андреева Қорытынды турнирде қаншалықты мықты болды? Ол жай ғана жақсы емес, керемет ойын көрсетті. Нәтижелерді қайталаудың мәні жоқ, турнирді бәрі тамашалады. Бәрін жайпап өтті. Бірде-бір сетте ұтылған жоқ, максималды сыйақы жинады, AMG SL ("Мерседес" көлігі - ред. ескертпесі) иеленді және өзін керемет сезінеді", - деп есептейді сарапшы.

Айта кетейік, Қазақстанның бірінші ракеткасы Елена Рыбакина Қорытынды турнирге қатыспады - жарыс басталуына бір күн қалғанда теннисші ауырып қалуына байланысты додадан бас тартатынын мәлімдеген болатын.

- Андреева Рыбакинаны жеңе алар ма еді, әлде бұл жерде сәттілік туралы айтқан дұрыс па?

- Әрине, қазір "егер Лена ойнағанда не болар еді" деген сияқты жорамалдар жасағым келмейді, сондықтан бұл туралы тіпті пікір білдірмеймін. Мен жай ғана маусым соңында Ленаға нақты не болғанын, себебі неде екенін білгім келеді. Дегенмен, ол жарыстан бас тартты, қысым мен бәсекелестіктен алшақтап, келесі маусымға дайындалуға уақыт ұтып алды. Келесі маусым бірінші орын үшін тартыс пен интрига тұрғысынан өте қызықты болғалы тұр. Арина Соболенконы да есептен шығаруға болмайды. Ол да жеке шаруаларын реттеп алып, бәсекеге қосылады, - деп атап өтті Андрей Пак.

Еске сала кетейік, Қорытынды турнирдегі жеңісі Андрееваны әлемнің екінші ракеткасы етті - ол Соболенкодан озып, Рыбакинаға 293 ұпайға дейін жақындады. Бірақ ресейлік теннисші бұл ұпайлардың орнын 2026 жылы толтыра алмайды - маусым аяқталды, жарыстар тек келесі қаңтарда қайта басталады.

Instagram-дағы бұл жарияланымды көру

Elena Rybakina 🐠 (@lenarybakina) жариялаған жазба

Андреева мен Рыбакина арасындағы бірінші орын үшін талас: кім фаворит?

Елена Рыбакинаның әлемдік рейтингтегі көшбасшылығындағы аздаған басымдығы келесі Australian Open-ге дейін-ақ жоққа шығуы мүмкін.

Егер Андреева маусымның алғашқы турнирі Брисбенде жеңіске жетсе, Рыбакина бірінші орнын сақтап қалу үшін кем дегенде жартылай финалға шығуы керек болады. Алайда одан кейін Мирраға Аделаидадағы 500 ұпайын қорғау қажет.

Instagram-дағы бұл жарияланымды көру

Tennis (@tennischannel) жарияланымы

Қалай болғанда да, Australian Open басталар алдында Андрееваның жағдайы тиімдірек болады - Рыбакина өткен жылғы 2000 ұпайын қорғауы тиіс, ал Андреева 2026 жылдың қаңтарында төртінші айналымда-ақ шығып қалған болатын.

"Оның 2027 жылы әлемнің бірінші ракеткасы болатынына күмән жоқ. Тіпті одан да ертерек, Australian Open-нен кейін-ақ бірінші орынға шығады деп айта аламын. Бұл жерде таза математика: Лена мен Мирра арасындағы айырмашылық қазір 300 ұпайдан аз және жағдай Мирра үшін өте тиімді. Ленаға Australian Open титулы үшін 2000 ұпайды қорғау керек, сондықтан ол финалға шыққан күннің өзінде 700 ұпайынан айырылады!

Бұл жерде ештеңе істей алмайсың. Мирраға өткен жылғы төртінші айналым үшін небәрі 240 ұпайды қорғау жеткілікті, сондықтан Australian Open-де ерте ұтылған жағдайда да, егер Лена турнирде қайтадан жеңіске жетпесе, ол рейтингті бастап кетуі мүмкін. Әрине, Лена жеңіске жете алады, бірақ Мирра Андреева да енді төртінші айналыммен шектеліп қалмас. Қазіргі 300 ұпайлық айырмашылықты ол Australian Open-де міндетті түрде еңсереді", - деп есептейді сарапшы.

Сонымен қатар рейтингтегі бірінші орынды жоғалту ықтималдығы қазақстандық теннисшінің шеберлік деңгейіне деген бағаға әсер етпейді.

"Маған Лена Australian Open қорытындысы бойынша бірінші орыннан айырылатын сияқты көрінеді. Бұған дайын болу керек және одан трагедия жасаудың қажеті жоқ. Тек өз жұмысын жалғастыру қажет. Меніңше, ол шеберлік деңгейі бойынша әлі де әлемдегі үздік ойыншы. Ең бастысы - толықтай жинақталып, жеке басындағы және денсаулығына қатысты мәселелерді шешу. Қазақстанның үздік теннисшісінен келесі жылы жарқын ойын күтеміз", - деді Андрей Пак.

Мирра Андреева - жаңа Мария Шарапова ма?

Андреева 19 жасында "Ролан Гаррос" пен Қорытынды турнирде жеңіске жетіп, маусым қорытындысы бойынша әлемнің екінші ракеткасы атағына ие болды.

Мұндай нәтижелер оны WTA рейтингінде ерте жоғары сатыға көтерілген тағы бір теннисші - 18 жасында бірінші орынға шыққан Мария Шараповамен жиі салыстыруға себеп болады. Біздің тілшімізбен болған әңгімеде сарапшы Андреева мен Шарапованы тікелей салыстырмау керектігін ескертті.

"Андреева - екінші Шарапова ма? Жоқ, мен олай демес едім. Мирра Андрееваның өзі ерекше қыз. Ол өз тарихын жазып жатыр. Мирра 2026 жылғы маусымды керемет аяқтады. Ол өз тарихын өзі қалап жатыр, сондықтан ол екінші Мария Шарапова емес, Мирра Андреева", - деп түйіндеді сарапшы.

Айта кетейік, 2026 жыл Елена Рыбакина мен Арина Соболенконың текетіресімен өтті. Қазақстандық теннисші әлемдік рейтингте қарсыласын ұзақ уақыт бойы өкшелеп келді, бірақ қыркүйекте US Open турнирінің финалында оны жеңіп, Беларусь өкілінен озып кетті.

Instagram-дағы бұл жарияланымды көру

Арина Соболенконың (@arynasabalenka) жарияланымы

Рыбакина қорытынды турнирден бас тартқаннан кейін WTA қандай шешім қабылдады?

Пікірлер