20 жастағы қазақстандық Азия ойындарында тарихи алтынды жеңіп алды

20 жастағы таэквондошы 58 келіге дейінгі салмақ дәрежесінің финалында Филиппин өкілі Курт Брайан Барбосамен кездесті.

Бірінші раундта қос қарсылас та соққыларды жиі өткізгенімен, қазақстандық спортшы бұл тартыста дәлірек қимылдап, 16:14 есебімен жеңіске жетті.

Екінші раундта Тамирлан басымдығын байқатты - ол 15:2 есебімен жеңіп, жалпы жекпе-жекті өз пайдасына шешті.

Раундтар бойынша есеп 2:0, Тамирлан Тілеулес жеңімпаз атанды.

Айта кетейік, 2026 жылғы Азиадаға дейін Қазақстан құрамасының қоржынында таэквондодан 17 медаль (3 күміс және 14 қола) болған. Жапониядағы Ойындарда Рита Бақышева виртуалды таэквондодан қола жүлдегер атанса, Батырхан Төлеуғали да қола жүлдені иеленді.

Тамирланның алтыны - Азия ойындарының осы бағдарлама түріндегі ел тарихындағы алғашқы жеңіс.

Тамирлан Тілеулес кім?

20 жастағы Алматы тумасы бұған дейін жасөспірімдер арасында Азия чемпионатын ұтып, өткен жылдың соңында жастар арасындағы әлем чемпионатында үшінші орынға ие болған.

Сонымен қатар, ол 2023 жылдан бастап ересектер деңгейінде өнер көрсетіп, халықаралық турнирлерде жүлде салып жүр.

Азия ойындарының медалі - Тамирланның мансабындағы қазіргі таңдағы ең басты жетістігі.

Қазақстанда Азиаданың 12 алтын медалі бар

Еске салайық, жас таэквондошының алтыны - бүгінгі жарыс күніндегі ұлттық құраманың үшінші жоғары марапаты. Бұған дейін финалда боксшылар Төрехан Сабырхан мен Айбек Оралбай жеңіске жеткен болатын.

Бұл табыс Қазақстан құрамасына жалпы медальдық есепте 8-орынға көтерілуге мүмкіндік берді. Команда еншісінде 12 алтын, 20 күміс және 42 қола медаль бар.

Бұған дейінгі жазғы Азия ойындарында Қазақстан құрамасы 10 алтын медаль иеленіп, жалпы есепте 11-орын алған еді.

Айбек Оралбай Азиаданың финалында өзбекстандықты ойсырата жеңді