Айбек Оралбай Азиаданың финалында өзбекстандықты ойсырата жеңді

Фото: instagram.com/boxingkazakhstan

90 келіден жоғары салмақ дәрежесінде сынға түсетін қазақстандық боксшы Айбек Оралбай 2026 жылғы Азия ойындарының алтын медалін иеленді, деп хабарлайды Tengri Sport.

Финалдық жекпе-жекте Қазақстан ерлер құрамасының капитаны өзбекстандық Жахонгир Зокировпен қолғап түйістірді.

Instagram-дағы бұл жарияланымды көру

Kazakhstan Boxing Federation (@boxingkazakhstan) жариялаған жазба

Жекпе-жек барысы

Алғашқы раунд айтарлықтай сабырлы басталды: боксшылар тиімді қашықтықты іздеп, тактика таңдаумен болды. Оралбай бірінші нөмірмен жұмыс істей бастап, жекелеген соққыларды нысанаға дәл тигізуге тырысты. Ал өзбекстандық боксшы қашықтықты сақтай отырып, ара-тұра бастаманы өз қолына алуға күш салды.

Раунд соңына қарай Оралбай шабуылды үдетіп, бірнеше рет сәтті соққы жасады. Төрешілер қазақстандықтың басымдығын ескеріп, жеңісті отандасымызға берді – 3:2.

Екінші раунд қазақстандық үшін белсендірек өтті. Оралбай джеб арқылы қашықтықты бағамдап, қарсыласы қорғанысын ашқан сәтте соққылар комбинациясын жасап отырды. Бір сәтте жақын қашықтықтағы айқастан кейін Зокиров желкеден соққы жұмсағаны үшін төреші оның бір ұпайын алып тастады. Өзбекстандық боксшы қорғаныс үшін клинчке жиі жүгіне бастады. Екінші раундта төрешілер жеңісті бірауыздан Оралбайға берді – 5:0.

Үшінші раундта Зокиров қазақстандыққа қарсы шабуылға көшті. Ол ұзақ соққылар сериясын жасап, ауыр бүйірлік соққылармен алға ұмтылды. Оралбай қорғанып қана қоймай, қарымта шабуылмен жауап бере алды. Раунд ортасына қарай қос боксшының да қарқыны бәсеңдеп, бұл соққылардың дәлдігіне әсер етті. Дегенмен қазақстандық спортшы ширақтық танытты: ол жылдам қозғалып, белсенді соққы жұмсады.

Үш раундтың қорытындысы бойынша Айбек Оралбай 5:0 есебімен айқын жеңіске жетіп, Азиаданың алтын медалін қоржынға салды.

Instagram-дағы бұл жарияланымды көру

Kazakhstan Boxing Federation (@boxingkazakhstan) жариялаған жазба

Еске сала кетейік, Азия ойындарының жартылай финалында Айбек Оралбай Үндістан өкілі Нарендерді тізе бүктірген болатын. Үш раунд бойы қарсыласын соққының астына алған қазақстандық оған финалға шығуға еш мүмкіндік қалдырмады. Нәтижесінде Айбек Оралбай төрешілердің бірауыздан шығарған шешімімен 5:0 есебімен жеңіске жетті.