60 жастағы қазақстандық Азия Пара ойындарының медалін жеңіп алды

Еркін стильдегі 4×50 метрлік аралас эстафетада Қазақстан құрамасынан Наталья Звягинцева, Айсұлтан Күлкеев, Сиязбек Дәлиев және Зүлфия Габидуллина сынға түсті. Ұлттық құрама қашықтықты 2:48.99 секундта жүзіп өтіп, турнирдің күміс жүлдесіне ие болды.

Жарыста 2:25.22 секунд нәтижесімен Қытай құрамасы жеңіске жетсе, үшінші орынды Филиппин спортшылары иеленді - 2:54.64 секунд.

Зүлфия Габидуллина - Қазақстан құрамасының әйгілі спортшысы

Зүлфия Габидуллина спортпен 1990 жылы шұғылдана бастады.

Бір жылдан соң ол мүгедектер арбасындағы жарыстан өткен алғашқы президенттік сайысқа қатысып, төрт алтын медаль жеңіп алды.

1994 жылы ол жеңіл атлетика және жүзу сияқты екі дисциплина бойынша бақ сынап, сегіз рет бірінші орынды иеленді. Сондай-ақ Зүлфия - халықаралық дәрежедегі спорт шебері.

Сонымен қатар Зүлфия Габидуллина - әлем чемпионаттарының жеті дүркін жүлдегері: 2013 жылы Монреальда (Канада) екі қола мен бір күміс, 2014 жылы Глазгода (Шотландия) екі қола, сондай-ақ 2017 жылы Мехикода (Мексика) бір алтын мен бір күміс медаль еншілеген.

Бұдан бөлек, ол Джакартада (Индонезия) өткен Азия Пара ойындарында төрт медаль алды: бір қола (еркін стильде 200 метрге), екі күміс (шалқалап жүзуден 50 метр және еркін стильде 50 метр) және бір алтын медаль (еркін стильде 100 метрге).

Габидуллинаның басты жетістігі - 2016 жылғы Риодағы (Бразилия) Паралимпиада ойындарының алтын медалі. S3 санатында еркін стильде 100 метрлік қашықтықта қазақстандық спортшы мәреге бірінші келіп, Қазақстан үшін тарихи медальді жеңіп алды.

Ал 2024 жылы Парижде (Франция) өткен Паралимпиада ойындарында Габидуллина S4 класы бойынша 50 метрге еркін стильде жүзуден финалға шықты. Ол қашықтықты 43,75 секундта аяқтап, 7-орынға табан тіреді.

Фото: Паралимпиада комитеті/ Нұрғали Жұмағазы

Месси және Роналдумен ойнаған Әли Тұрғанбеков Қазақстанға Азия Пара ойындарының медалін сыйлады