UFC Қазақстанның үздік файтеріне қатысты маңызды шешім қабылдады

Фото © Tengrinews.kz / Тұрар Қазанғапов

Қазақстандық файтер Асу Алмабаев рейтингтің жаңа нұсқасында бұрынғыдан жоғары көтерілді. Промоушен жаңа рейтингті нейрожелілердің көмегімен жасаған, - деп хабарлайды Tengri Sport.

Қазақстандық файтер Асу Алмабаев рейтингтің жаңа нұсқасында бұрынғыдан жоғары көтерілді. Промоушен жаңа рейтингті нейрожелілердің көмегімен жасаған, - деп хабарлайды Tengri Sport.

Американың басты жекпе-жек промоушені әр кездесудің деректеріне негізделген жаңа рейтинг жүйесін іске қосты.

Осы нұсқа бойынша Асу бір сатыға жоғарылады. Қазақстандық спортшы ирандық Әмір Альбазиді басып озды.

Айта кетейік, өзгерістер Асудың алдағы қарсыласы Чарльз Джонсонға да қатысты болды.

Жаңа нұсқада ол бір сатыға төмендеген.

Фото: ufc.com

UFC баспасөз қызметі рейтингтің жаңа нұсқасын былай деп түсіндірді.

"Спортшылардың жеке рейтингін анықтау үшін жүйе статистикалық модельдеу мен машиналық оқытуды UFC-дің осы саладағы терең білімімен ұштастырады. Ол нәтиже ықтималдығын, жеңіс түрін, файтердің даму траекториясын және салмақ дәрежелеріне сезімталдығын қоса алғанда, объективті көрсеткіштердің жан-жақты жиынтығын бағалайды.

Барлық жеңіс пен жеңіліс бірдей қарастырылмайды: Meta UFC рейтингіне сәйкес, жоғары рейтингтегі қарсыласты жеңу төмен рейтингтегі қарсыластан басым түскенге қарағанда маңыздырақ, ал үздік бестіктегі үміткерді айқын жеңу рейтингте жоқ қарсыласты төрешілер шешімімен жеңгеннен гөрі күштірек сигнал болып табылады", - деді промоушен.

"Рейтингтерге қарамаймын" - Асудың бапкері өзгерістер туралы

UFC рейтингіндегі қазақстандық жалғыз белсенді файтер Асу Алмабаев осы демалыста октагонға оралады. Бакуде (Әзербайжан) өтетін турнирде қазақстандықтың қарсыласы АҚШ өкілі Чарльз Джонсон болмақ.

Алмабаевтың бапкері Эдуард Базров тілшімізге берген сұхбатында шәкіртінің алдағы жекпе-жекке толық дайын екенін мәлімдеді.

"Біз Бакуге 4-і күні келдік - бұл жекпе-жек алдындағы соңғы дайындық жиынымыз. Оған дейін Осетияда бір халықаралық жиын және Алматыдағы тау бөктеріндегі базамызда жаттығу өткіздік. Үш кезеңнен өттік, енді тек салмақ өлшеу қалды, біз дайынбыз", - деді тәлімгер.

Рейтинг мәселесіне келсек, файтердің командасы оның үлкен маңызы бар деп есептемейді.

"Мен рейтингтерге қарамаймын - бұл жеке мен үшін ештеңені білдірмейді, себебі бұл ММА. Спортта неше түрлі жағдай болады. Ең бастысы, біз шығып, қолымыздан келгеннің бәрін көрсетуге дайынбыз", - деді Базров Tengri Sport-қа берген сұхбатында.

Еске салсақ, Алмабаев пен Джонсон арасындағы жекпе-жек 27 маусымда өтеді және Қазақстан уақытымен шамамен 21:00-де басталуы тиіс.