“Әбден күлдім“ - Жәнібек Әлімханұлы әлем чемпионының жекпе-жекке шақыруы туралы

Доминикан елінің өкілі, WBC нұсқасы бойынша орта салмақтағы әлем чемпионы Карлос Адамес кеше ғана Жәнібекпен жұдырықтасқысы келетінін мәлімдеген болатын.

Қазақстандықтың менеджері Берік Сұлтан мұны "хайп жинауға талпыныс" деп атаса, Әлімханұлының өзі бір күннен кейін қалыптасқан жағдайға байланысты келемежбен пікір білдірді.

"Кеше әбден күлдім. Анау Адамес мені жекпе-жекке шақырыпты. Тәуір молда тауып, соған дем салғызып жіберу керек еді. Баладан обал! "Шығайық" десем қашады. Қашып бара жатып "төбелесейік" дейді. Мен оны түсінбедім. Кеше күлкіден жауап та бере қалдым", - деп жазды Әлімханұлы әлеуметтік желіде.

Айта кетейік, биыл Әлімханұлы орта салмақтағы титулдардан бас тартып, қазіргі уақытта салмағы ауырлау категорияда чемпиондық белбеу үшін келіссөздер жүргізіп жатыр.

Ал Адамеске келетін болсақ, 2025 жылдың шілде айының басында Әлімханұлы Карлос Адамеспен орта салмақтағы WBO, IBF (қазақстандықтың белбеулері) және WBC (доминикандықтың белбеуі) нұсқалары бойынша әлем чемпионы атағы үшін жекпе-жекке келісімшартқа отырғанын мәлімдеген. Алайда Адамес өз тарапынан келісімшартқа қол қоймай, кейін боксшылар арасында әлеуметтік желілерде сөз талас басталды.

Қазақстандықтар екі салмақ дәрежесінде әлем чемпионы атануы мүмкін

Айта кетейік, қазір Карлос Адамеспен жекпе-жекке тағы бір қазақстандық Мейірім Нұрсұлтанов үміткер болып отыр. Ол кіші Хесус Рамосқа қарсы WBC уақытша белбеуі үшін жұдырықтасуы керек еді, бірақ қарсыласы улануын сылтауратып, кездесуден бас тартты.

Енді Адаместі Нұрсұлтановпен жекпе-жекке шығуға міндеттеуі немесе титулын тапсыруды талап етуі мүмкін.

Ал Әлімханұлына келетін болсақ, WBO супер-орта салмақтағы бос тұрған белбеу үшін оған қарсылас тағайындап қойды - ол даниялық Якоб Банк. Бұл жағдай британдық Хамза Шираз титулдан бас тартқаннан кейін болып отыр.