Әлем чемпионы Жәнібек Әлімханұлын жекпе-жекке шақырды

Британиялық боксшы, WBO тұжырымы бойынша уақытша әлем чемпионы Дензел Бентли қазақстандық Жәнібек Әлімханұлына үндеу жасады, деп хабарлайды Tengri Sport.

Дензел Бентли өзінің әлеуметтік желілерінде WBO белбеуінің иегері, қазақстандық боксшы Жәнібек Әлімханұлына арналған жазба жариялады.

Британиялық спортшы чемпионның тек сөзбен шабуылдап жатқанын айтып, Әлімханұлын жекпе-жекке шақырды.

"Жәнібек маған тіл тигізіп, бұғаттап тастады. Мына "качокқа" біреу жеткізсінші: егер оның бокс лицензиясы болса және рингке шығуына рұқсат берілсе, келесі жолы жұдырықтасайық", - деп жазды Бентли.

Еске сала кетейік, бұған дейін Бентли мен Әлімханұлы сөзге келіп қалған болатын. Британиялық боксшы Әлімханұлы бір жылдық дисквалификациясын өтеп жатқанда, WBO-дан өзін толыққанды чемпион деп тануды талап еткен еді.

Қазақстандық боксшы болса Бентли онымен жекке-жекке шығуға қорқып отыр және титулды айқассыз иеленгісі келеді деп жауап берді.

"Енді ол менің ресми үміткерім. Ол менің титулымды жекпе-жексіз тартып алғысы келеді. Қазір ол жылап, бәрі оны қолдауы керек деп жатыр! Неге? Өйткені ол менімен жұдырықтасудан қорқады", - деді Әлімханұлы.

Жәнібек Әлімханұлына қатысты допинг дауы

Еске сала кетейік, 2025 жылдың желтоқсанында кубалық Эрисланди Лараға қарсы үш титул үшін өтуі тиіс жекпе-жекке бірнеше күн қалғанда, қазақстандық чемпионға допинг қолданды деген айып тағылған болатын. Сынамалардың бірінен тыйым салынған заттар табылып, салдарынан титулдық кездесу өтпей қалды.

2026 жылдың басында В сынамасы ашылып, допингтің бар екені расталды.

Осыдан кейін Дүниежүзілік бокс ұйымы (WBO) Жәнібекті бір жылға шеттету туралы шешім шығарды, бірақ оны чемпиондық белбеуінен айырған жоқ.

IBF өз үкімін 10 наурызда жариялады: ұйым регламентіне сәйкес, Әлімханұлы чемпиондық өкілеттігін тапсыруға мәжбүр болды.