Әлем чемпионы Қазақстанға бокстан Азиаданың алғашқы медалін сыйлады

Фото: Қазақстан бокс федерациясы

Бокстан әлем чемпионы Алуа Балқыбекова Азия ойындарының 1/4 финалында жапониялық Юна Нишинаканы жеңді, деп хабарлайды Tengri Sport.

51 келіге дейінгі салмақ дәрежесіндегі жекпе-жек толық үш раундқа созылып, төрешілердің шешімімен қазақстандық спортшының пайдасына (3:2) аяқталды.

Осылайша, Алуа бокстан Қазақстан әйелдер құрамасының сапынан 2026 жылғы Азияданың жартылай финалына жолдама алған алғашқы спортшы атанды. Жарыс регламентіне сәйкес, Азия ойындарында үшінші орын үшін талас өткізілмейді, сондықтан Балқыбекова кем дегенде қола медальді қамтамасыз етті.

Айта кетейік, бұған дейін Айбек Оралбай ерлер құрамасынан жартылай финалға шыққан алғашқы боксшы болған еді.

Алуа Балқыбекова - қазақстандық екі дүркін әлем чемпионы

Еске сала кетейік, өткен жылы Алуа Балқыбекова бокстан екі ұйымның нұсқасы бойынша әлем чемпионы атанды. Наурыз айында ол 50 келіге дейінгі салмақта IBA турнирін жеңіп алса, қыркүйекте Ливерпульде (Англия) World Boxing турнирінде үздік атанды.

Instagram-дағы бұл жарияланымды көру

Kazakhstan Boxing Federation (@boxingkazakhstan) жариялаған жазба

Бокстан Қазақстан құрамасы Азия ойындарында

Жапонияда өтіп жатқан Азия ойындарында Қазақстан құрамасынан 11 спортшының бесеуі жарыстан шығып кетті.

60 келіге дейінгі салмақ дәрежесінде бірінші кезеңде Оразбек Асылқұлов, ал 80 келіге дейінгі салмақта Сабыржан Аққалықов жарыс жолынан шығып қалды. Екеуі де Оңтүстік Корея өкілдеріне есе жіберді.

Әйелдер құрамасында әлемнің үш дүркін чемпионы Назым Қызайбай (54 келіге дейін), Аида Әбікеева (65 келіге дейін) және Виктория Графеева (60 келіге дейін) медальдан үмітін үзді.

Жарысты Айбек пен Нұрбек Оралбай, Төрехан мен Махмұд Сабырхан, сондай-ақ Алуа Балқыбекова мен Наталья Богданова жалғастырып жатыр.

Азия ойындары 4 қазанға дейін жалғасады.