Бес дүркін Олимпиада чемпионы өз кандидатурасын ұсынатынын Instagram парақшасында жариялады. Оның айтуынша, саяси тәжірибенің жоқтығы сайлаушыларды алаңдатпауы тиіс.
"Менің есімім – Тедди Ринер, бүгін мен сіздердің көздеріңізге тік қарап тұрып айтамын: мен 2027 жылы Франция президенттігіне өз кандидатурамды ұсынамын. Мен туралы не айтатынын білемін: "Ол есі ауысқан адам. Ол бұл ортадан емес. Ол ойын ережесін білмейді. Ол ешқашан саясатпен айналысқан емес". Бірақ ойланып көрейікші: бүгінде нағыз ессіздік деген не?
Францияның күн өткен сайын мемлекеттік қарыздың ауыр жүгінен тереңге батып бара жатқанына көз жұму ессіздік емес пе? Осындай бай елдің өзін кедейлікке сендіруі ессіздік емес пе? Отағасы немесе ананың супермаркетте арбаны толтырып жатып, амалсыз тістенуіне мәжбүр болатын жағдайды төзгісіз деп санау ессіздік пе?" - деді ол.
Айта кетейік, президенттік додаға ресми түрде қосылу үшін ол тағы бірқатар ресми рәсімнен өтуі керек. Мысалы, сайланбалы лауазымды тұлғалардан 500 қол жинауы қажет.
Елдің қазіргі президенті Эммануэль Макрон спортшыға қолдау білдіріп үлгерді.
"Тедди Ринер сияқты ұлы чемпионның, тұлғаның осы президенттік пікірталасқа қосылып, өзінің сенімі мен идеяларын, талантын ала келуге шешім қабылдағанына өте қуаныштымын. Бұл елге пайдалы болмақ. Бұл – оның орны. Меніңше, бұл кез келгеніңіздің, бәріміздің орнымыз. Бірақ оған қатысты айтар болсам, бұл шешім – жақсы қадам", - деп мәлімдеді ол сұхбатта.
Тедди Ринердің пікірінше, президенттік қызмет те оның алтыншы Олимпиада алтыны үшін бақ сынауына кедергі болмайды.
"Президенттік міндеттерім мүмкіндік берсе және француз халқының батасын алсам", - деп атап өтті ол.
Тедди Ринер деген кім және оның Қазақстанмен қандай байланысы бар?
Француз дзюдошысы 19 жыл бойы әлемдік спорттың шыңында келеді. Ринер алғашқы Әлем чемпионатын 2007 жылы жеңіп алған, ал жалпы оның еншісінде 11 алтын медаль бар.
Бұдан бөлек ол 2008 жылдан бері бес Олимпиадаға қатысып, әрқайсысынан медальмен оралды. Бейжіңдегі алғашқы ойындарында қола, кейін Лондонда (2012) және Риода (2016) алтын, Токиода (2021) жекелей сында қола, бірақ командалық сында алтын, ал Парижде (2024) екі алтын медаль иеленді.
Айта кетейік, Ринердің Бейжіңдегі алғашқы Олимпиадасындағы қарсыластарының бірі қазақстандық Елдос Ихсанғалиев болды. Француз бұл белдесуде мерзімінен бұрын жеңіске жетті.
2015 жылы Ринер Астанада өткен Әлем чемпионатына қатысып, барлық бес белдесуінде жеңіске жетті. Ал 2023 жылы қазақстандық дзюдошыларға жаттығу өткізу үшін Алматыға келді. Кейін берген сұхбаттарының бірінде ол қазақстандық ауыр салмақтағы балуандардың көптігіне таңғалғанын еске алды.
"Мен Қазақстанға оқу-жаттығу жиынына барғанда, маған 30-40 ауыр салмақты балуан шығарды. Мен бұған дейін мұндайды еш жерде көрмегенмін", - деді ол.
Фото: ijf.org
Еске сала кетейік, келесі жазғы Олимпиада 2028 жылдың жазында Лос-Анджелесте (АҚШ) өтеді. Франциядағы сайлау 2027 жылдың сәуір-мамырына жоспарланған.