Әлем кубогі: қазақстандық боксшы Еуропаның жаңа жұлдызын жеңді

Қазақстандық боксшы Тимур Нұрсейітов Қытайда өтіп жатқан бокстан Әлем кубогінің 1/8 финалында ирландиялық Тадг О’Доннеллді жеңді, деп хабарлайды Tengri Sport.

75 келіге дейінгі салмақ дәрежесіндегі жекпе-жек тартысты өтті: тек бір төреші ғана қазақстандықтың айқын басымдығын (30:27) таныса, екеуі Тимурға минималды басымдық берді, ал тағы екі төреші жеңісті ирландиялыққа берген.

Жекпе-жектің қорытынды есебі - қазақстандықтың пайдасына 3:2.

Айта кетейік, Тимур Нұрсейітов 29 жаста, ол - 2021 жылғы әскери қызметшілер арасындағы бокстан әлем чемпионы.

Ал ирландиялық спортшыға келетін болсақ, ол 2026 жылдың басында жасөспірімдер арасындағы Еуропа чемпионатында алтын иеленіп, нағыз жұлдызға айналған болатын. Әлеуметтік желілерде оның турнирдегі жеңісінен кейін мектепке оралған сәті түсірілген видеолар кеңінен таралды.

Тағы бір қазақстандық мерзімінен бұрын жеңіске жетті

Нұрсейітовтен бөлек, бүгін Қытайдағы Әлем кубогі кезеңінде еліміздің тағы бір өкілі - Санатәлі Төлтаев жеңіске жетті. 65 келіге дейінгі салмақ дәрежесіндегі 1/16 финалда ол әзірбайжандық Малик Хасановпен қолғап түйістірді.

Жекпе-жек екі раундқа созылып, содан кейін қарсыласы алған жарақатына байланысты кездесуді жалғастырудан бас тартты.

Еске сала кетейік, Гуйяндағы (Қытай) бокстан Әлем кубогі кезеңі 15-21 маусым аралығында өтеді. Жарыстың алғашқы күні бір спортшымыз - Наталья Богданова жарыс жолынан шығып қалды.

Бұған дейін Әлем кубогі кезеңінде қазақстандық әлем чемпионы Айбек Оралбай жеңіске жеткен болатын.

Сондай-ақ тағы бір қазақстандық - Сабыржан Аққалықов та айқын басымдықпен жеңіске жетті.

Қазақстан бокстан Әлем кубогін жеңіспен бастады