+7 (777) 001 44
99
Әлемнің екінші ракеткасы, қазақстандық теннисші Елена Рыбакина Римде (Италия) өтіп жатқан турнирдегі жанкүйерлердің қолдауы туралы пікір білдірді. Қазақстандық спортшы аталған сында ширек финалға шығып, әлемнің бұрынғы бірінші ракеткасын жеңді, деп хабарлайды Tengri Sport.
Соңғы матчта Рыбакина әлемнің бұрынғы үздік теннисшісі, чехиялық Каролина Плишкованы ойсырата ұтты (6:0; 6:2).
Матчтан кейін қазақстандық теннисші трибунадағы көрермендерге алғыс айтып, жанкүйерлер арасында балалардың көп екенін ерекше атап өтті.
"Римді жақсы көремін. Қаланың өзі де, мына стадион да керемет. Әрине, жанкүйерлер де, мұнда кез келген кортта әрдайым жағымды атмосфера орнайды. Әрқашан халық та, балалар да көп. Бұл өте тамаша. Қаланың өзі адамға қатты әсер ететіні соншалық, мұнда мүмкіндігінше ұзағырақ қалғың келеді. Бұл жолы соған тырысамын", - деді Рыбакина кортта берген сұхбатында.
Айта кетейік, Рыбакина 2023 жылы Римдегі WTA 1000 сериялы турнирінде жеңімпаз атанған болатын.
Осы маусымда жартылай финалға жолдама алу үшін қазақстандық спортшы украиналық Элина Свитолинамен кездеседі.
Елена Рыбакина және балалар
Еске сала кетейік, Елена Рыбакина биылғы маусымда алғаш рет әлемдік рейтингтің екінші сатысына көтеріліп, Australian Open титулын жеңіп алды.
Сонымен қатар қазақстандық теннисші жиі балалардың ортасында жүреді – тіпті Римдегі осы турнирде ол жергілікті бүлдіршіндермен жаттығу өткізіп үлгерген.
Елена Рыбакина бүгін Римде көптеген жас ойыншымен бірге балаларға арналған мастер-класс өткізді.#IBI26
— Sebastien G. (@sebsharfam2) 2026 жылғы 5 мамыр
📸ERASPORTSAGENCY pic.twitter.com/Bv0dp9Q999
Жеке өміріне келетін болсақ, әзірге Рыбакинаның отбасы мен балалары жоқ. Tengri Sport басылымына берген сұхбатында теннисші болашақта отбасын құруды жоспарлап отырғанын айтты.
"Жалпы алғанда, мен бәрін үйлестіргім келеді. Үлкен дулыға турнирлерін де, Олимпиаданы да жеңіп алып, әрине, кейін отбасын құрсам деймін. Бәрі өз уақытымен келеді деп ойлаймын. Мансабымды қашан аяқтайтынымды болжау қиын, бірақ осы сәттердің барлығының басы біріккенін қалаймын", - деп жауап берген еді қазақстандық спортшы.
