Әлімханұлы әлем чемпионымен келісімшарттан кейін UFC басшысына қатысты пікір білдірді

Орта салмақтағы WBC нұсқасы бойынша доминикандық әлем чемпионы Карлос Адамес Zuffa-мен келісімшартқа отырғанын мәлімдеді. Лига бұл жаңалықты жариялап, Адаместі өз салмағында өзгелер ең көп қашқақтайтын боксшылардың бірі деп атады.

"Бокста өзгелер ең көп қашқақтайтын ер адамдардың бірі Zuffa Boxing құрамына қосылды! Орта салмақ дәрежесіндегі WBC әлем чемпионы, рейтингтің 1-сатысындағы Карлос Адамес ресми түрде келісімшартқа отырды!" - делінген лига хабарламасында.

Қазақстандық боксшы Адамеске мұндай атақ лайық емес деп санайды.

"Дана оны бәрі қашқақтайтын боксшы деп сенді деп ойламаймын. Біз оның кім екенін жақсы білеміз", - деп жазды ол әлеуметтік желіде.

Еске сала кетейік, Әлімханұлының Адаместі келеке етуіне негіз бар. 2025 жылдың шілдесінде қазақстандық спортшы Карлос Адамеске қарсы жекпе-жекке келісімшартқа қол қойғанын мәлімдеген болатын. WBO, IBF және WBC нұсқалары бойынша орта салмақтағы әлем чемпионы атағы үшін айқас жоспарланған. Алайда Адамес келісімшартқа қол қоймай, кейін боксшылар арасында әлеуметтік желілерде сөз таласы басталды.

Биыл Адамес X желісінде басқа салмақ дәрежесіне ауысып кеткен Жәнібекті жекпе-жекке шақырған еді. Бұған қазақстандық спортшы кезекті рет мысқылмен жауап берсе, оның менеджері Берік Сұлтан Tengri Sport-қа берген сұхбатында Адаместің "хайп жасағысы келетінін" айтты.

“Хайп жасағысы келеді“: Әлімханұлы әлем чемпионымен жекпе-жекке қатысты шешім қабылдады

Zuffa деген не?

Zuffa Boxing - 2025 жылдың маусымында UFC президенті Дана Уайт пен Сауд Арабиясының шейхы Турки Аль-Шейх негізін қалаған кәсіпқой бокс лигасы. Айта кетейік, соңғысы жақында кәсіпқой бокстағы жұмысынан кететінін жариялаған болатын.

Лигада Қазақстанның екі өкілі бар - Иван Дычко мен Данияр Елеусінов. Дычко жаңа лигада бір жекпе-жекте жеңіске жетіп үлгерсе, Елеусінов әзірге бірде-бір кездесу өткізген жоқ.

“Тарихи жекпе-жек“ - нокаутшы Әлімханұлымен титул үшін өтетін жекпе-жек туралы