“Тарихи жекпе-жек“ - нокаутшы Әлімханұлымен титул үшін өтетін жекпе-жек туралы

Фото © Tengrinews.kz / Тұрар Қазанғапов

Даниялық боксшы Якоб Банк қазақстандық Жәнібек Әлімханұлына қарсы жекпе-жек оның мансабындағы ең маңызды әрі ең табысты кездесу болатынын мәлімдеді, деп хабарлайды Tengri Sport TV Syd телеарнасына сілтеме жасап.

25 жастағы даниялық нокаутшы Жәнібек Әлімханұлының супер орта салмақтағы алғашқы қарсыласы атанбақ. Оның айтуынша, қазақстандықпен өтетін бұл айқастың ол үшін маңызы зор.

"Бұл - тарихи оқиға. Осы титулдың Данияда қалуы үшін қолымнан келгеннің бәрін жасаймын. Мен осы соманың жартысын ғана алсам да, Данияда боксқа шығуға рұқсат берілсе болды деп айтқан едім. Бұл - Кесслер заманынан бері Данияда өтетін әлем чемпионы атағы үшін алғашқы жекпе-жек. Содан бері 15 жылға жуық уақыт өтті. Бұл таңғаларлық жағдай. Бұл менің мансабымдағы ең маңызды жекпе-жек және ең үлкен гонорар. Мәселе ешқашан ақшада болған емес, менің осы айқасқа қатысты ішкі түйсігімде болды. Оның Данияда өтетініне сену қиын", - деді ол өз сұхбатында.

Бұған дейін The Ring басылымы жекпе-жектің 2026 жылдың желтоқсанында Копенгагенде өтетінін хабарлаған болатын, алайда қазір Банктің промоутері Каспер Хольгерсен кездесу 2027 жылдың қаңтарында өтетінін, ал нақты орны алдағы 14 күн ішінде белгілі болатынын мәлімдеді.

Якоб Банк деген кім?

Даниялық Якоб Банк Жәнібек Әлімханұлынан жеті жас кіші болса да, кәсіпқой рингте 20 жекпе-жек өткізіп үлгерген. Оның 11-і мерзімінен бұрын жеңіспен аяқталған.

Оның мансабындағы ең шулы жекпе-жек 2026 жылдың басында өтті. Сол кезде Банк 12-раундта тәжірибелі кубалық Уильям Скуллды нокаутқа түсіріп, одан WBO Global белбеуін тартып алған болатын. Банкпен кездескенге дейін дәл осы кубалық боксшы Канелоға қарсы барлық 12 раунд бойы жұдырықтасқан еді.

Instagram-дағы бұл жарияланымды көру

DAZN Boxing (@daznboxing) жарияланымы

Әлімханұлының жаңа салмақтағы титул үшін алғашқы жекпе-жегі

Орта салмақтағы әлемнің экс-чемпионы алғаш рет жаңа санатта бақ сынайды. Бұл бәсекеде WBO нұсқасы бойынша әлем чемпионы атағы сарапқа салынады.

Еске сала кетейік, Әлімханұлы соңғы рет рингке 2025 жылдың сәуірінде шыққан болатын. Сол кезде ол Астанада өткен турнирде француз Анауэль Нгамессингені нокаутқа түсірген еді.

Осыдан кейін Жәнібек орта салмақтағы үшінші титул үшін Эрисланди Ларамен жұдырықтасуы керек еді, бірақ допинг жанжалына байланысты жекпе-жек өтпей қалды. Нәтижесінде қазақстандық дисквалификация мерзімін өтеп, анағұрлым ауыр салмақ дәрежесіне ауысты.

Супер орта салмақтағы WBO чемпионы белбеуінің алдыңғы иегері Хамза Шираз Әлімханұлы міндетті үміткер болып тағайындалғаннан кейін титулдан бас тартты.