2026 жылы Қазақстан бокстан әлем чемпионы атағы үшін жекпе-жек өткізеді - БАҚ

Фото © Tengrinews.kz / Тұрар Қазанғапов

Дүниежүзілік бокс ұйымының (WBO) президенті Густаво Оливьери қазақстандық Жәнібек Әлімханұлы супер орта салмақтағы титулдық жекпе-жегін жеңілмеген даттық Якоб Банкпен өткізетінін мәлімдеді, деп хабарлайды Tengri Sport әлеуметтік желілерге сілтеме жасап.

WBO басшысының айтуынша, тараптар келісімге келді, алайда титулдық жекпе-жектің нақты күні мен өтетін орны кейінірек жарияланады.

Кейін даттық боксшының менеджері Спенсер Браун беделді The Ring басылымына титул сарапқа салынатын кездесу 2026 жылы өтетінін хабарлады.

"Якоб Банк пен Жәнібек Әлімханұлы желтоқсан айында Копенгагенде (Дания) супер орта салмақтағы бос тұрған WBO титулы үшін жекпе-жек өткізуге келісті", - деп жазады басылым менеджердің сөзіне сүйеніп.

Jacob Bank and Janibek Alimkhanuly have agreed to terms to meet for the vacant WBO super middleweight title in December in Copenhagen, Denmark, Bank’s manager Spencer Brown tells The Ring’s Mike Coppinger. https://t.co/k38IHEEKxT
— Ring Magazine (@ringmagazine) October 7, 2026

Әлімханұлының тарапы бұл шешімге әзірге жауап берген жоқ, бірақ WBO басшысы келіссөздердің аяқталғанын хабарламас бұрын, қазақстандықтың әлеуметтік желісінде кез келген жерде жұдырықтасуға дайын екенін білдіретін жазба пайда болды.

"Маған жекпе-жектің қайда және кіммен болатыны бәрібір. Мен айқасамын! Маған тек осы титул керек. Мен бұл белбеу үшін Айда болсын, мұхит түбінде болсын жұдырықтасуға дайынмын. Маған бәрібір! Қарсыласым тіпті өзге ғаламшарлық болса да маңызды емес. Тек титулды бәске тігіңіздер!" - деп жазды боксшы Instagram-да.

Якоб Банк деген кім?

25 жастағы даттық Якоб Банк Жәнібек Әлімханұлынан жеті жас кіші, бірақ кәсіпқой рингте 20 жекпе-жек өткізіп үлгерген. Оның 11-і мерзімінен бұрын жеңіспен аяқталды.

Даттық боксшының мансабындағы ең айтулы жекпе-жек 2026 жылдың басында өтті. Сол кезде Банк 12-раундта тәжірибелі кубалық Уильям Скуллды нокаутқа түсіріп, одан WBO Global белбеуін тартып алған болатын. Банкпен кездескенге дейін сол кубалық боксшы Канелоға қарсы барлық 12 раунд бойы шыдас берген еді.

Instagram-дағы бұл жарияланымды көру

DAZN Boxing (@daznboxing) жарияланымы

Еске сала кетейік, Әлімханұлы соңғы рет рингке 2025 жылдың сәуірінде шыққан болатын. Сол кезде ол Астанада өткен турнирде француз Анауэль Нгамессингені нокаутқа түсірген еді.

Осыдан кейін Жәнібек орта салмақтағы үшінші титул үшін Эрисланди Ларамен жұдырықтасуы керек еді, бірақ допинг жанжалына байланысты жекпе-жек өтпей қалды. Нәтижесінде қазақстандық дисквалификация мерзімін өтеп, анағұрлым ауыр салмақ дәрежесіне ауысты.

Супер орта салмақтағы WBO чемпионы белбеуінің алдыңғы иегері Хамза Шираз Әлімханұлы міндетті үміткер болып тағайындалғаннан кейін титулдан бас тартты.