Алты алтын медаль: бокстан Азия чемпионатындағы күн қорытындысы

19 жасқа дейінгі санатта қазақстандық қыздар барлық үш финалдық жекпе-жекте жеңіс туын желбіретті.

Алғашқы алтынды Өзбекстан өкілімен болған шайқаста Камила Оспанова (70 келіге дейін) иеленді, кейін Айдана Ұбайдуллақызы мен Зарина Толыбай Үндістаннан келген қарсыластарын (80 келіге дейін және 80 келіден жоғары) тізе бүктірді.

U-23 санатында Гүлназ Бөрібаева (48 келіге дейін), Азиза Исина (70 келіге дейін) және Шұғыла Нәлібай (75 келіге дейін) жеңіске жетті. Олар Моңғолия, Өзбекстан және Үндістан спортшыларынан басым түсті.

Тағы үш қазақстандық боксшы - Анита Әдішева, Ұлжан Сәрсенбек және Құралай Егінбайқызы күміс жүлдені қанағат тұтты.

Айта кетейік, 19 және 23 жасқа дейінгі спортшылар арасындағы бокстан Азия чемпионаты Индонезияда өтіп жатыр. Екі жас санаты бойынша ерлер арасындағы финал ертең болады.

Қазақстан - Үндістан жекпе-жектері Қазақстанға Азия чемпионатының екі алтын медалін әкелді