“Антидепрессанттар ішкен болар“ - Елеусіновтің менеджері спортшының қамауға алынуы туралы

Әлеуметтік желіден алынған фото, © Tengrinews.kz / Тұрар Қазанғапов

Бокстан қазақстандық Олимпиада чемпионы Данияр Елеусіновтің менеджері Зия Әлиев қамауға алу шарасы шәкіртінің мансабына қалай әсер ететінін айтты, - деп хабарлайды Tengri Sport.

Менеджер бұл жағдай Елеусіновтің шаршы алаңдағы болашағына кесірін тигізбейді деп есептейді.

Сонымен қатар, ол боксшының мас күйде болғанына сенбейтінін атап өтті.

"Бұл қалай әсер етуі керек? Ешқандай әсері болмайды. Данияр тізгінге мас күйде отырды дегенге сенбеймін. Мүмкін, қандай да бір антидепрессанттар ішкен болар. Қыста да оның отбасылық жағдайына байланысты қиындықтары болды, біз онымен сөйлесіп, талқылағанбыз. Өмірінде болып жатқан жағдайлардың бәрін тым ауыр қабылдайтын сияқты.

Ең бастысы зардап шеккендер жоқ. Негізі Данияр Майамиге ұшып келіп, жаттығуын бастауы керек еді, өйткені тамызда Zuffa-да жекпе-жек өткізу бойынша келіссөздер жүргізіп жатырмыз. Біз оның Майамиге келіп, дайындығын осында бастауын күткен едік", - деді Әлиев Tengri Sport-қа берген сұхбатында.

Еске салайық, бүгін таңертең Данияр Елеусінов Астанада үш жол-көлік оқиғасына себепкер болып, оқиға орнынан қашпақ болған кезде ұсталғаны белгілі болды.

Threads желісінен көру

Сот боксшыны кінәлі деп танып, ол 20 тәулікке қамауға алынды және 7 жылға жүргізуші куәлігінен айырылды.

Данияр Елеусіновтің мансабы

Айта кетейік, Данияр Елеусінов - бокстан Қазақстаннан шыққан соңғы Олимпиада чемпионы. Ол 2016 жылғы Ойындардың алтынын иеленген болатын.

2018 жылы кәсіпқой боксқа ауысып, 2021 жылға қарай IBO нұсқасы бойынша әлем чемпионы атағына қол жеткізді, кейін үш жыл бойы промоутерлермен соттасып, уақытын жоғалтты.

Былтыр Елеусінов UFC басшысы Дана Уайт басқаратын Zuffa промоушенімен келісімшартқа отырды. Алайда, қазақстандық спортшы осы уақытқа дейін жаңа лигада жекпе-жек өткізген жоқ.