“Астана“ клубына 5 жылда 39 миллиард жұмсалған: қаржыландыру мәселелері шешілді ме?

"Астана" ФК мәлімдемесіне сәйкес, клубты қаржыландыру мәселелері Туризм және спорт министрлігі, клуб құрылтайшылары, сондай-ақ команданың дамуы мен болашағына бейжай қарамайтын азаматтардың арқасында шешілген.

"Астана" футбол клубы соңғы уақытта клуб қызметінің тұрақтылығына әсер еткен қаржылық мәселелердің реттелгенін хабарлайды", - делінген мәлімдемеде.

Айта кетейік, 9 қыркүйекте клуб ресми мәлімдеме жасап, онда негізгі құрам ойыншыларына қарыз екенін растаған болатын. Бұл әлеуметтік желілерде ойыншылардың клуб басшылығына жолдаған ұжымдық хаты жарияланғаннан кейін белгілі болды.

"Астанаға" 39 миллиард теңге жетпеген

Клубтың басты демеушісі болып табылатын Sport Qory да "Астананы" қаржыландыруға қатысты біздің редакцияға пікір берді.

Қор ақпараты бойынша, биылғы маусымның өзінде командаға 3 миллиард теңге көлемінде қайырымдылық көмек бөлінген, ал кейінгі 5 жылда "Астана" барлығы 40 миллиард теңгеге жуық қаражат алған.

"2026 жылы клубқа 3 миллиард теңге көлемінде қайырымдылық көмек көрсетіліп, ол толық көлемде аударылды. Сонымен қатар, еурокубоктарға қатысқаны үшін клуб УЕФА-дан шамамен 500 миллион теңге алды. Жалпы алғанда, 2021–2026 жылдар аралығында Қор желісі бойынша клубты дамытуға шамамен 32,7 миллиард теңге бағытталды, тағы 7 миллиард теңгеге жуық қаражатты клуб УЕФА желісі бойынша алды.

Бұл қаражат клубтың ағымдағы қызметін қамтамасыз ету, соның ішінде ойыншылар мен қызметкерлер алдындағы міндеттемелерін орындау үшін қаржылық негіз болып табылады.

Қазіргі уақытта мемлекет тарапынан қосымша қаражат бөлу қарастырылмаған. Бұл кәсіби спортты қаржыландыру тәсілдерінің өзгеруіне байланысты: мемлекеттік саясат ең алдымен балалар мен жасөспірімдер спортын дамытуға, отандық спортшыларды даярлауға және тұрақты спорттық резервті қалыптастыруға бағытталған. Жаңа тәсілдер аясында легионерлерді ұстауға байланысты шығындарды қаржыландыру қарастырылмаған", - делінген жауапта.

Осылайша, 2021-2026 жылдар аралығында қор мен УЕФА тарапынан клуб бюджетіне 39,7 миллиард теңге салынған.

Сонымен қатар Sport Qory өкілдері жақын арада клубтың жеке инвесторы пайда болатынын атап өтті.

"Қазіргі уақытта жеке инвесторды тарту жұмыстары аяқталу сатысында. Стратегиялық инвестордың келуі клубтың тұрақты қаржылық моделін қалыптастыруға, басқару тиімділігін арттыруға, ұзақ мерзімді тұрақтылықты қамтамасыз етуге және "Астананың" одан әрі спорттық дамуы үшін қажетті жағдайлар жасауға мүмкіндік береді деп сенеміз", - деп мәлімдеді қордағылар.

Еске салайық, "Астана" инвесторының бар екенін туризм және спорт министрі Ербол Мырзабосынов 2025 жылғы 30 желтоқсанда үкіметте өткен брифингте мәлімдеген болатын, бірақ оның есімін атамады.

"Астана" - Қазақстандағы ең титулды команда

Еске салайық, "Астана" - елдің жеті дүркін чемпионы, футболдан Қазақстан кубогының үш дүркін иегері, сондай-ақ біздің чемпионат тарихында Чемпиондар лигасының негізгі кезеңіне шыққан алғашқы өкіл.

Дегенмен, соңғы үш жылда команда чемпиондықты қайтара алмай келеді: 2023 жылы "Ордабасы", ал 2024 және 2025 жылдары "Қайрат" чемпион атанды. Биыл да "Астана" үшінші орында келеді және алтын медальдан үмітін үзуге жақын.

Алдағы матчте команда біріншілік көшбасшыларының бірі - шымкенттік "Ордабасымен" кездеседі.

Еске салайық, "Астана" футбол клубы 2009 жылы "Локомотив" деген атаумен құрылып, 2011 жылы қазіргі атауын иеленген. 2012 жылы команда "Астана" президенттік кәсіби спорт клубының құрамына енді.

2020 жылы таратылғанға дейін оның құрамына "Барыс" ХК, "Астана" ФК, "Астана" велокомандасы, "Астана Арланс" бокс клубы, "Астана" баскетбол клубы, сондай-ақ Astana Dakar Team ралли-рейд командасы кірген болатын.