"Алтын доп" сайтының қолданушыларына марапат тарихындағы ең маңызды "Алтын допты" таңдау ұсынылды. Сыйлық сайтындағы халықтық дауыс беру қазан басында басталып, енді оның қорытындысы шығарылды.
Негізгі бәсеке аталған сыйлықты ең көп иеленген қос саңлақ - Криштиану Роналду (5 "Алтын доп") мен Лионель Месси (8 "Алтын доп") арасында өрбіді.
Дауыс беру нәтижесі бойынша португалиялықтың 2008 жылы алған алғашқы "Алтын добы" тарихтағы ең үздік деп танылды. Екінші орында Мессидің 2012 жылғы марапаты тұрса, үшінші орынды тағы да Роналдудың 2017 жылғы жетістігі иеленді.
Айта кетейік, дауыс беруге қатысу үшін бір еуро төлеу қажет болды. Әр "Алтын доп" үшін нақты қанша дауыс берілгені белгісіз, бірақ сыйлық сайты бес мыңнан аса адамның бірнеше рет дауыс бергенін көрсететін статистиканы жариялады.
"5009 адам бір реттен көп дауыс берген. Толығырақ мәлімет мынадай:
44 адам 10-нан 26 ретке дейін дауыс берген;
300 адам 5-тен 9 ретке дейін дауыс берген;
Жалпы алғанда 4665 адам 2-ден 4 ретке дейін дауыс берді", - делінген сайт хабарламасында.
Роналду қай маусым үшін жаңа атаққа ие болды?
2008 жылы Криштиану Роналду ағылшындық "Манчестер Юнайтед" сапында өнер көрсеткен болатын. Ол кезде команда Премьер-лига мен Чемпиондар лигасын жеңіп алып, финалдағы пенальти сериясында лондондық "Челсиден" басым түскен еді.
Жекелей алғанда, бұл Роналдудың ең үздік маусымы емес, соған қарамастан ол лиганың (31 гол) және Чемпиондар лигасының (8 гол) үздік сұрмергені атанды.
Салыстырмалы түрде айтсақ, Месси 2012 жылы "Алтын допты" иеленген маусымында Ла Лигада 50 гол, ал Чемпиондар лигасында 14 гол соққан болатын.
Роналду 2026 жылғы "Алтын доп" бәсекесінде нешінші орында?
Айта кетейік, 41 жастағы футболшы 2025/2026 маусымындағы "Алтын доп" үміткерлерінің тізіміне енбеді. Нәтижесінде бұл марапатты ағылшын Харри Кейн жеңіп алса, Лионель Месси дауыс беруде бесінші орынға табан тіреді.
Бұған дейін "Барселона" мен Испания құрамасының вингері Ламин Ямаль "Алтын доп" сыйлығының қорытындысы туралы пікір білдірген болатын.