Азаматтығын ауыстырған қазақ ММА жұлдызымен жекпе-жекке шығады

Жартылай жеңіл салмақта PFL лигасында өнер көрсететін қазақстандық аралас жекпе-жек шебері Саламат Исбулаев бұрынғы чемпион Эй Джей МакКимен жұдырықтасады, деп хабарлайды Tengri Sport.

Америкалық PFL промоушенінің баспасөз қызметі жеңіліс көрмеген қазақстандық файтер Саламат Исбулаев пен лиганың экс-чемпионы, танымал спортшы Эй Джей МакКи арасындағы жекпе-жекті жариялады.

Кездесу 28 маусымда Сан-Диего (Калифорния штаты, АҚШ) қаласындағы "Pechanga Arena" стадионында өтеді, ал бұл жұптың бәсекесі кештің басты оқиғасы болмақ.

Еске сала кетейік, қазақстандық Саламат Исбулаев PFL-дегі дебютін 2026 жылдың ақпанында сәтті өткізген болатын.

Лига аясындағы алғашқы жекпе-жегінде ол PFL Гран-приінің бұрынғы чемпионы Хесус Пинедомен кездесіп, оны бірінші раундта-ақ нокаутқа түсірді. Қазақстандық спортшы қарсыласын партерге түсіріп, айқыштап ұстау әдісін қолданды, төреші жекпе-жекті тоқтатып, техникалық нокаутты тіркегенше соққының астына алды.

Эй Джей МакКи деген кім?

Эй Джей МакКи – Bellator ұйымындағы (кейіннен PFL құрамына өткен) өнерімен танымал болған, қазіргі заманғы аралас жекпе-жектің ең жарқын өкілдерінің бірі.

Ол соққы беру техникасын күрес пен грэпплингтің жоғары деңгейімен ұштастыра білетін әмбебаптығымен танымал.

МакКи Bellator-дың жартылай жеңіл салмақтағы Гран-приінде жеңіске жетіп, мерзімінен бұрын аяқталған әсерлі жеңістер сериясының арқасында ерекше танымалдылыққа ие болды.

Турнир финалында ол Патрисио Фрейрені жеңіп, чемпиондық белбеуді иеленді және өз буынының ең көп талқыланатын файтерлерінің біріне айналды.

Айта кетейік, Саламат Исбулаев – этникалық қазақ, Ресейдің Орынбор қаласында дүниеге келген және бұған дейін Ресей атынан өнер көрсетіп келген. Алайда бірнеше жыл бұрын Қазақстанға көшіп келіп, еліміздің азаматтығын алды. Осы жылдың наурызында спортшы тиісті құжаттарын алған болатын.