Азиада-2026: Әлижан Аблагатов ушудан Қазақстан үшін алғашқы медальді жеңіп алды

Фото: Сали Сабиров/ҰОК

Қазақстан ұлттық құрамасының өкілі Әлижан Аблағатов Жапонияның Айти-Нагоя қаласында өтіп жатқан XX жазғы Азия ойындарының қола жүлдегері атанды, деп хабарлайды Tengri Sport.

Қазақстандық спортшы ушу-саньдадан 70 келіге дейінгі салмақ дәрежесінде бақ сынады.

Жартылай финалда Аблағатов Иран өкілі Мохаррами Пирагоммен кездесті. Жекпе-жек қорытындысы бойынша қарсыласы жеңіске жетіп, Әлижан Азиададағы өнерін қола медальмен тәмамдады.

Туризм және спорт министрлігі бұл медаль биылғы Азия ойындарында ушудан Қазақстан құрамасының қоржынына түскен алғашқы жүлде екенін атап өтті.

Сонымен қатар, команда тағы бір марапатты иеленетінін нақтылады. Абдурашид Абдуллаев 75 келіге дейінгі салмақ дәрежесінде финалға шығып, алтын медаль үшін таласады. Жартылай финалда отандасымыз Қытай Тайбэйінің өкілі Хуан Жанды жеңді. Бұған дейін ширек финалда Абдуллаев Непал спортшысы Санджив Махарджанды мерзімінен бұрын ұтқан болатын.

Ушу Азия ойындары, Дүниежүзілік ойындар, Дүниежүзілік жауынгерлік өнер ойындары, Ислам ынтымақтастығы ойындары және жасөспірімдер арасындағы Азия ойындары сияқты ірі халықаралық кешенді жарыстардың бағдарламасына кіреді.