Азия чемпионаты: қазақстандық боксшы өзбекстандық қарсыласын нокаутпен жеңді

35 келіге дейінгі салмақ дәрежесінде сынға түсетін қазақстандық боксшы Жақсылық Ермекұлы жасөспірімдер арасындағы бокстан Азия чемпионатының жартылай финалына шықты, деп хабарлайды Tengri Sport.

Турнирдің ширек финалында қазақстандық боксшы өзбекстандық спортшы Достон Комиловпен кездесті.

Жекпе-жек үшінші раундқа дейін жалғасып, Ермекұлы қарсыласын бірнеше рет нокдаунға түсірді. Кезекті соққыдан кейін рефери жекпе-жекті тоқтатып, қазақстандыққа техникалық нокаутпен жеңіс берді.

Осылайша, Жақсылық Ермекұлы Азия чемпионатының жартылай финалына өтіп, өзіне кем дегенде қола медальді қамтамасыз етті.

Еске сала кетейік, бұған дейін тағы бір қазақстандық 2026 жылғы Азия чемпионатының жартылай финалына нокаутпен шыққан болатын. 70 келіге дейінгі салмақ дәрежесіндегі Аян Бауыржан үндістандық спортшы Мехул Ранені жеңді.

Аян Бауыржан үндістандықты нокдаунға түсірді, содан кейін төреші жекпе-жекті тоқтатуға шешім қабылдап, қазақстандыққа техникалық нокаутпен жеңіс берген.

Осылайша, Аян Бауыржан да өзіне кем дегенде қола медальді қамтамасыз етті, өйткені Азия чемпионатында үшінші орын үшін жекпе-жек өткізілмейді.

Айта кетейік, 15 және 17 жасқа дейінгі спортшылар арасындағы бокстан Азия чемпионаты Ташкентте (Өзбекстан) өтіп жатыр және ол 15 мамырға дейін жалғасады.