Азия чемпионаты: қазақстандық боксшы үндістандық қарсыласын ойсырата жеңді

60 келіге дейінгі салмақ дәрежесінде сынға түсетін қазақстандық Эмир Мұхит қарсыласын ойсырата жеңіп, жасөспірімдер арасындағы бокстан Азия чемпионатының жартылай финалына шықты, деп хабарлайды Tengri Sport.

Ташкентте (Өзбекстан) өтіп жатқан турнирдің ширек финалында қазақстандық боксшы үндістандық спортшы Карунг Албертсонмен жұдырықтасты.

Мұхит жекпе-жек барысын толық бақылауда ұстап, тік тұрып өткізілген соққылар бойынша қарсыласынан басым түсті.

Үш раундқа созылған жекпе-жек төрешілердің бірауыздан шығарған шешімі бойынша қазақстандық боксшының жеңісімен аяқталды. Осылайша, Эмир Мұхит Азия чемпионатының жартылай финалына шығып, турнирдің кем дегенде қола жүлдесін қамтамасыз етті.

Еске сала кетейік, бұған дейін тағы бір қазақстандық турнирдің жартылай финалына жолдама алған болатын. 57 келі салмақ дәрежесінде өнер көрсететін Нұрислам Оңалбек өзбекстандық Бекахан Оразбайды төрешілер шешімімен жеңіп, 17 жасқа дейінгі спортшылар арасындағы 2026 жылғы Азия чемпионатының қола жүлдесіне ие болды.

Айта кетейік, Ташкентте (Өзбекстан) өтіп жатқан 15 және 17 жасқа дейінгі спортшылар арасындағы бокстан Азия чемпионаты 15 мамырға дейін жалғасады.

Азия чемпионаты: қазақстандық боксшы өзбекстандық қарсыласын нокаутпен жеңді