“Барыс“ Мәскеуде “Динамоны“ ойсырата ұтты

Мәскеуде өткен кездесу негізгі уақытта 4:1 есебімен астаналықтардың пайдасына аяқталды.

Матчтің бірінші кезеңінде гол соғылған жоқ. Есеп екінші кезеңнің басында ашылды - 23-минутта Гарретт Пилон көзге түсті.

28-минутта Никита Коростелев есепті теңестірді. Алты минуттан соң Пилон ресейлік клубтың қақпасына екінші шайбаны соқты.

Үшінші кезеңде, 46-минутта Джейк Масси есепті 3:1-ге жеткізіп, "Барысты" алға шығарды. Соңғы минутта Джастин Бейли "Динамо" қақпасын дәл көздеді.

Астаналықтар жеті матчте он ұпай жинап, Шығыс конференциясында үшінші орында тұр. "Динамо" сегіз ойыннан кейін сегіз ұпаймен Батыс конференциясында алтыншы сатыға жайғасқан.

Бұған дейін Михаил Кравецтің шәкірттері төрт рет жеңіске жеткен болатын — олар "Сибирьді" (7:1), "Салават Юлаевты" (8:6), "Ладаны" (6:0) және "Локомотивті" (5:0) ұтты. Сондай-ақ елордалық команда екі кездесуде "Амурдан" (1:3) және "Металлургтен" (0:3) жеңіліп қалды.

"Барыс" келесі матчін 25 қыркүйекте Астанада "Нефтехимикке" қарсы өткізеді.