“Бассейн қожайыны“: қазақстандық чемпион Әлем кубогіндегі рекорд туралы пікір білдірді

Қазақстандық спортшы өз елінде өтіп жатқан Әлем кубогінің алғашқы жарысында ел рекордын жаңартып, финалға жолдама алды. Айтуынша, Астанадағы бұл бәсекеде ол қатты қобалжыған.

- Туған жердің топырағы демеу болады дейді ғой. Сен үшін бұл рас па? Мұнда өнер көрсету оңай ма, әлде Азия ойындарында ма?

- Бұл екі бөлек дүние. Шынымды айтсам, бүгін таңертең қатты қобалжыдым, өйткені өз үйіңде өнер көрсету үлкен жауапкершілік жүктейді. Ата-анам, көптеген достарым мен таныстарым қолдау білдіруге келді, сондықтан сенім үдесінен шыққым келді.

- Бассейнде жанкүйерлердің қолдауын қаншалықты сезінесің?

- Трибуналар толатынын түсіндім, бұл өте керемет, өйткені өз есімімді естіп тұрмын. Таңертең жарыс басталмай тұрып, өзімді осы бассейннің қожайыны сияқты сезіндім. Керемет, жанкүйерлердің қолдауы өте күшті.

- Хоккейшілерді көре алмаушылық жоқ па? Олардың ҚХЛ-дағы кез келген матчінде 12 мың адам жиналса, Әлем кубогі кезеңінде жүзуден 1000-ға жуық адам ғана отыр.

- Көре алмаушылық - өте ауыр сөз. Менің тарапымнан тек құрмет бар десем болады. Жігіттер үшін осындай қолдаудың барына қуаныштымын.

- Кейінгі баспасөз мәслихатында "Барыс" бапкері Михаил Кравецке төрешілер ережебұзушылықты аңғаруы үшін хоккейшілерді жүзушілерге барып "сүңгуді" үйренуге жіберу туралы ұсыныс жасалды. Ал сіз хоккейшілерден не үйренер едіңіз?

- Меніңше, жігіттер сыртқы факторларға назар аудармай, ойынға керемет беріле алады. Осыны мен де үйренуім керек, себебі біз әрдайым аудитория мен көрермен назарын қалаймыз, бірақ сол назармен жұмыс істеуді де меңгеру қажет екенін сезінемін.

Софья Сподаренко рекорд пен Олимпиада туралы

Спортшы 50 метрге баттерфляй әдісімен жүзуден Қазақстан тарихында алғаш рет Астанада өтіп жатқан Әлем кубогі кезеңінде рекорд орнатты. Іріктеу кезеңінде ол 26 секундтық межеден асып түсіп, финалға шықты. Алайда, финалдың кешкі бағдарламасында бұл жетістікті қайталай алмады.

- Неге ұлттық рекорд кешкі емес, таңертеңгі уақытта орнатылды?

- Меніңше, таңертең қобалжу басымырақ болған сияқты. Әрине, рекордтарды кешкі уақытта жаңарту керек, бұл жүз пайыз менің қателігім. Бір күнде екінші рет рекорд жасағым келген. Қолдан келгені осы болды. Нені түзеуге болатынын ойластырамын.

Бұл биылғы 25 метрлік бассейндегі алғашқы жарыс, оның ерекшелігі сәл басқаша. Алдағы жарты жыл қысқа су айдынында өтетіндіктен, бұған көбірек көңіл бөлемін.

- Осы қашықтықта Олимпиада ойындарына іріктеуден өтуді жоспарлап отырсыз ба? Қазір өз әлеуетіңізді қалай бағалайсыз? Бұл жолы бұл кедергіні еңсеру мүмкін бе?

- Бұл спорт әлеміндегі ең жағымсыз сұрақ. Қазір 50 метрлік қашықтықта іріктеу шарттары тым көп. Қосымша мүмкіндік болуы үшін мен 100 метрлік қашықтықты да қатар дайындаймын.

- Қазір жалақы немесе басқа да мәселелер бойынша қиындықтар бар ма?

- Меніңше, бізде Азия ойындарына дайындық кезеңі жақсы өтті және әлі де жалғасып жатыр. Мысалы, бізді Азия ойындарына ертерек әкелгендеріне қуаныштымын.

Бізде Жапонияда ауа райына бейімделуге мүмкіндік берген керемет оқу-жаттығу жиыны болды. Мұнда да дайындықты алдын ала бастадық. Қазір бәрі өз ретімен жүріп жатыр, ал маусымның одан арғы барысы осы жарыстардың қорытындысы бойынша белгілі болады. Келесі додаларға арналған командалар жасақталады. Ал бұл енді менің шешімім емес.

Софья Сподаренко деген кім?

Өскемен тумасы, 28 жастағы спортшы елге оралып, 2023 жылдан бастап Қазақстан құрамасының намысын қорғап келеді.

Оның қоржынында Азия чемпионаты мен Ислам ынтымақтастығы ойындарының алтыны, сондай-ақ елдің көптеген рекорды бар.

Әлем кубогі басталар алдында өткен баспасөз мәслихатында Олимпиада чемпионы әрі Қазақстан жүзу федерациясының бас хатшысы Софья спортшы ғана емес, инфлюенсер екенін ерекше атап өтті.

Айта кетейік, Софья Әлем кубогінің Астанадағы кезеңінде 100 метрге баттерфляй әдісімен жүзуден де финалға жолдама алды.

“Көзілдірік керек пе“: “Барыс“ КХЛ-дағы даулы төрелік туралы сұраққа жауап берді

“Ешкім ұрмайды“ - Қазақстан құрамасының мүшесі жүзудің басқа спорт түрлерінен артықшылығы туралы