“Ешкім ұрмайды“ - Қазақстан құрамасының мүшесі жүзудің басқа спорт түрлерінен артықшылығы туралы

Фото: instagram.com/kazswimteam/ видеодан кадр

Жүзуден Қазақстан құрамасының мүшесі Айбат Мырзамұратов ашық судағы жарыстар кезінде қандай қиындықтарға тап болғанын айтып, өз спорт түрінің бокстан айырмашылығына тоқталды, деп хабарлайды Tengri Sport.

19 жастағы қазақстандық спортшы Астанада өтетін Әлем кубогының үй иесі ретіндегі кезеңіндегі басты қарсыластары туралы сұраққа жауап бере отырып, оның спорт түріндегі бәсекелестік бокс немесе күрестегідей сезілмейтінін мәлімдеді.

"Жаттықтырушым ең басты қарсыласым - ол өзім екенін айтады. Өз нәтижелерімді жақсартуым керек. Бұл бокс та, күрес те емес қой. Ешкіммен жұдырықтаспаймын, спаррингке түспеймін. Мені ешкім ұрмайды. Менің өз жолағым бар. Бұл ашық су да емес қой. Есімде, 2022 жылы Қазақстан Республикасының чемпионатында ашық суда өнер көрсеткенмін.

Дәл ортада қалып қойдым, сол жерде мені абайсызда ма, әлде әдейі ме, түртіп қалып жатты. Біреу бауырдан, біреу аяқтан, қолдан, бастан ұрды. Жүзудің артықшылығы неде: мұнда бокс немесе күрестегідей тікелей жанасу жоқ. Қысқасы, ең басты қарсылас - өзіммін", - деді спортшы Әлем кубогының үй иесі ретіндегі кезеңі алдында өткен баспасөз мәслихатында.

Instagram-дағы бұл жарияланымды көру

Антон Бованың жарияланымы (@spor_tjob)

Еске сала кетейік, Мырзамұратов Қазақстан тарихында алғаш рет өтетін жүзуден Әлем кубогы кезеңіне қатысатын ұлттық құрама сапына енді. Жарыс 15-17 қазан аралығында "Барыс - Аренада" өтеді.

Жүзуден Әлем кубогы: билет бағасы неге мұндай қымбат?

Айта кетейік, Астанадағы жүзуден Әлем кубогы кезеңіне билеттер бір жарыс күні үшін 10 мың теңгеден немесе үш күнге 25 мың теңгеден басталады.

Салыстыру үшін: Астанада өтетін күрес бойынша әлем чемпионатына билеттер 9 мың теңгеден, Құрлықтық хоккей лигасының (ҚХЛ) матчіне - 2 мың теңгеден, ал Almaty Open теннис турниріне - 3675 теңгеден басталады.

Tengri Sport тілшісі баға белгілеу туралы сұрақты Қазақстан жүзу федерациясының бас хатшысы, Олимпиада чемпионы Дмитрий Баландинге қойды.

- Сіз Астанада Әлем кубогын өткізу жүзуді дәріптеу екенін айтасыз, бірақ жарысты тамашалауға арналған билеттер 10 мың теңгеден басталады. Мұндай баға қайдан шықты, оны кім белгілейді және неге арзанырақ әрі қолжетімді ету мүмкін болмады?

"Иә, бұл жағдайды түсінемін. Әрине, біз өз тарапымыздан World Aquatics халықаралық федерациясымен билеттерге қатысты келіссөздер жүргізуге тырыстық. Бұл жерде біз World Aquatics ұсыныстарын орындаймыз - бұл, ең алдымен, солардың іс-шарасы. Жарыс солардың аясында өтеді және оларда белгілі бір ережелер жиынтығы бар. Яғни, қарапайым тілмен айтқанда, бұл World Aquatics-тің Әлем кубогы кезеңіне ұсынған бағасы", - деді Баландин.

Айта кетейік, Дмитрий Баландин - Қазақстан тарихындағы жүзуден жалғыз Олимпиада чемпионы. Ол 2016 жылы Риода (Бразилия) өткен Ойындарда 200 метрге брасс әдісімен жүзуде алтын жеңіп алған болатын.

Қазақстан құрамасының көшбасшысын командаға АҚШ-тан жібермей қойды: мән-жайы