Қазақстан құрамасының көшбасшысын командаға АҚШ-тан жібермей қойды: мән-жайы

Видеодан кадрлар

Жүзуден Қазақстан әйелдер құрамасы көшбасшыларының бірі Ксения Игнатова әлем кубогінің елімізде өтетін кезеңінде құрамаға көмектесе алмайды. Жүзу федерациясының бас хатшысы, Олимпиада чемпионы Дмитрий Баландиннің айтуынша, оның өзі білім алып жатқан америкалық жоғары оқу орны алдында міндеттемелері бар, деп хабарлайды Tengri Sport.

Астанадағы әлем кубогі кезеңіне қатыспайтыны туралы Ксенияның өзі әлеуметтік желіде жазды. Оның айтуынша, бұл сәт - әр спортшының өміріндегі ең ауыр кезеңдердің бірі.

"Бұл спортшы өміріндегі ең қиын сәттердің бірі - бұдан да үлкен мақсаттар мен мүмкіндіктер үшін өзіңе шынымен ерекше, маңызды және жаныңа жақын нәрседен бас тартуға тура келеді. Кейде бір уақытта екі жерде болғың келсе де, қиын таңдау жасауға мәжбүрсің. Өткен Азия ойындары маған бәрі енді басталғанын көрсетті. Өз елімді әлемдік аренада мақтанышпен таныту үшін бұдан да мықты болып оралатыныма уәде беремін", - деді ол.

Tengri Sport тілшісі турнир алдындағы баспасөз мәслихатында Ксения Игнатоваға қатысты түсініктеме алды. Спортшының орнына Дмитрий Баландин жауап берді.

- Ел тарихындағы маңызды додалардың бірінде әйелдер құрамасы көшбасшысының сапта болмауына қатысты, неге басымдықтар бұлай қойылды?

- Мен жауап берейін. Қазір Ксения Игнатова туған жерінде өтетін жүзуден әлем кубогіне қатыса алмағанына өте қатты өкінеді. Ол үшін бұл өте маңызды. Оның бұл жағдайды қалай уайымдап жүргенін өз көзіммен көрдім. Бірақ қазір Ксения Игнатова Республиканың ұлттық құрама мүшесі ғана емес, Америкадағы университеттің студенті. Оларда қазір қызу дайындық жүріп жатыр, сондықтан ол Америкадағы университеті алдындағы міндеттемелеріне байланысты бұл жарысқа қатыса алмады", - деді Баландин.

- Бұл міндеттемелер құрама алдындағы міндеттерден қалайша жоғары болып шықты?

- Құрама алдындағы міндеттемелер, сөзсіз, бар және Ксения оларды Азия ойындарында толықтай орындады. Ксения келіп, өнер көрсетіп, барын салды. Бірақ спортшының өмірінде болашақ дайындық үшін кейбір жарыстарды өткізіп алуға тура келетін кездер болады. Ксенияның 28-ші жылғы Әлем чемпионаты мен Олимпиада ойындарына болашақ дайындығы, әрине, басымдықта туp. Өкінішке қарай, қазір оның басқа таңдауы болмады, оған ұлттық құрама сапынан кетіп, жаттығу процесіне оралуға тура келді", - деп атап өтті Дмитрий.

Еске сала кетейік, ел тарихында алғаш рет жүзуден әлем кубогінің кезеңі Астанада 15-17 қазан аралығында өтеді.

Ксения Игнатова деген кім?

21 жастағы спортшы шалқалап жүзуге маманданған. Жас болса да - ұлттық құрамадағы ең тәжірибелі спортшылардың бірі. 2024 жылы ол іріктеуден өтіп, Париждегі Олимпиада ойындарында бағын сынады.

Ол шалқалап 200 метрге жүзуден және еркін стильде 200 метрге жүзуден ұлттық рекорд иегері. Сондай-ақ оның қоржынында жасөспірімдер арасындағы Азия чемпионатының алтыны бар.

Дегенмен, кейінгі Азия ойындарында Ксения да, Қазақстанның жүзуден бүкіл құрамасы да жүлдесіз қалды.