Бокстан Әлем кубогі: Қазақстан Өзбекстанды басып озып, үш алтын жеңіп алды

Бокстан Қазақстан құрамасы Бразилияда өткен Әлем кубогінің бірінші кезеңінде жеті медаль жеңіп алып, жалпыкомандалық есепте үшінші орынға ие болды, деп хабарлайды Tengri Sport.

27 сәуірге қараған түні Бразилияның Фос-ду-Игуасу қаласында бокстан Әлем кубогінің алғашқы кезеңі аяқталды. Оған Қазақстаннан 16 спортшы қатысты. Олардың үшеуі алтыннан алқа тақса, бір аруымыз финалда есе жіберіп, күмісті қанағат тұтты, тағы үшеуі қола жүлдегер атанды.

Бокстан Әлем кубогінде кімдер жүлде алды?

Әлем кубогінің алғашқы алтынын 60 келіге дейінгі салмақ дәрежесінде Виктория Графеева иеленді.

Ол төрешілердің шешімімен бразилиялық Ребекка Сантосты жеңді.

85 келіге дейінгі салмақ дәрежесінде екінші алтынды Сұлтанбек Айбарұлы иеленді - ол да төрешілер шешімімен бразилиялық Кауэ Белиниден басым түсті.

Әйелдер арасында 80 келіден жоғары салмақ дәрежесінде Валерия Аксенова да алтын алды - ол венгриялық София Сзираны 5:0 есебімен тас-талқан етті.

Қазақстандық әлем чемпионы Аида Әбікеева финалда есе жіберіп, күміс жүлдегер атанды. Қола жүлдені тағы бір әлем чемпионы Алуа Балқыбекова (51 келіге дейін), сондай-ақ Жібек Жарасқызы (80 келіге дейін) мен Диас Молжігітов (80 келіге дейін) иеленді.

Бразилияда өткен Әлем кубогінің қорытынды кестесі

Қазақстан құрамасы жалпы есепте Бразилия мен Қытайға жол берді.

1. Бразилия - 4+5+0;
2. Қытай - 4+0+1;
3. Қазақстан - 3+1+3;
4. Әзербайжан - 3+0+1;
5. Польша - 2+0+3;
6. Өзбекстан - 2+0+1;
7. Норвегия - 1+1+1;
8. Венесуэла - 1+0+0;
9. Испания - 0+2+2;
10. Венгрия - 0+2+0;
11. АҚШ, Франция - 0+1+2;
12. Аустралия, Марокко, Жапония - 0+1+1;
13. Армения, Мексика, Сербия, Хорватия - 0+1+0;
14. Канада - 0+0+3;
15. Англия, Аргентина, Италия, Түркия - 0+0+2;
16. Аустрия, Бельгия, Болгария, Германия, Қытай Тайбэйі, Қырғызстан, Молдова - 0+0+1.

Айта кетейік, Әлем кубогінің кезеңдері - World Boxing ұйымының жаңа жарысы, оның алғашқы маусымы былтыр өткен. Бразилиядағы турнирде Қазақстан ерлер құрамасы негізгі құрамсыз өнер көрсетсе, әйелдер сапынан бірінші нөмірлі спортшылар қатысты.