Бокстан Азия чемпионатының қола медалін алған көпбалалы ана марапатталды

Қазақстандық боксшы Әйгерім Сәттібаева 2026 жылғы Азия чемпионатында иеленген қола медалі үшін сыйақы алды, деп хабарлайды Tengri Sport.

Бокстан Қазақстан құрамасының мүшесі Әйгерім Сәттібаева Моңғолияның Ұлан-Батор қаласында өткен 2026 жылғы Азия чемпионатында қола жүлде иеленгені үшін 1 миллион теңгелік ақшалай сертификатты алды.

Сондай-ақ оның жеке бапкеріне 500 мың теңгенің сертификаты табысталды.

Сәттібаевадан бөлек, тағы бір спортшы мен оның жаттықтырушысы марапатталды. Грек-рим күресінің шебері Алматбек Аманбек Қырғызстанның Бішкек қаласында өткен күрес түрлерінен Азия чемпионатында алтын медаль жеңіп алды.

Оған 3 миллион теңгенің, ал бапкеріне 1 миллион теңгенің сертификаты берілді.

Еске сала кетейік, 48 келіге дейінгі салмақ дәрежесіндегі 1/4 финалда Сәттібаева өзбекстандық Сабина Бобокуловаға қарсы рингке шықты. Жекпе-жек толық аяқталып, төрешілердің 3:2 есебіндегі шешімімен отандасымыз жеңіске жетті.

Жартылай финалда қазақстандық спортшы ринг иесі Номундари Энх-Амганалдан басым түсе алмады.

Бірінші раундта бес төрешінің үшеуі Саттыбаеваны жеңімпаз деп таныса, екінші раундта барлық арбитр қарсыластың жағында болды.

Нәтижесінде төрешілердің шешімімен (0:5) жеңіс Номундари Энх-Амганалға берілді.

Турнир регламенті бойынша бокстан қола медаль үшін жекпе-жек өткізілмейді. Осылайша, Әйгерім Азия чемпионатының қола жүлдегері атанды.

Айта кетейік, 34 жастағы Әйгерім Сәттібаева - боксшы Олжас Сәттібаевтың жары. Ерлі-зайыптының бес баласы бар, бұл Әйгерімнің спорттық мансабын сәтті жалғастыруына кедергі болмаған.

Алматбек Аманбекке келетін болсақ, 72 келіге дейінгі салмақ дәрежесіндегі шешуші белдесуде Қазақстан өкілі ирандық Мохаммад Джавад Саадат Резаимен кездесті.

Кездесу қазақстандық спортшының мерзімінен бұрын жеңісімен (таза жеңіс) - 2:1 есебімен аяқталды.