Бокстан Қазақстан құрамасы Әлем кубогіне қатысатын жұлдызды құрамын жариялады

Бокстан Қазақстан құрамасы World Boxing ұйымдастырған, Қытайдың Гуйян қаласында өтетін Әлем кубогінің екінші кезеңіне қатысатын құрамды жариялады, деп хабарлайды Tengri Sport.

15-21 маусым аралығында Гуйянда (Қытай) World Boxing Әлем кубогінің екінші кезеңі өтеді.

Турнирге қатысатын Қазақстан құрамасы додаға аттанатын жұлдызды спортшылардың тізімін жариялады.

Тізімге ерлер арасында 9 боксшы және әйелдер арасында 8 боксшы енді.

Әлем кубогі кезеңіне қатысатын Қазақстан құрамасының құрамы

Ерлер

• 50 келі - Санжар Ташкенбай;
• 55 келі - Тимур Қабдешов;
• 60 келі - Серік Теміржанов;
• 65 келі - Санатәлі Төлтаев;
• 70 келі - Абылайхан Жүсіпов;
• 75 келі - Тимур Нұрсейітов;
• 80 келі - Сабыржан Аққалықов;
• 90 келі - Нұрбек Оралбай;
• 90 келіден жоғары - Айбек Оралбай.

Әйелдер

• 51 келі - Алуа Балқыбекова;
• 54 келі - Назым Қызайбай;
• 60 келі - Виктория Графеева;
• 65 келі - Аида Әбікеева;
• 70 келі - Лаура Есенгелді;
• 75 келі - Наталья Богданова;
• 80 келі - Валерия Аксенова;
• 80 келіден жоғары - Дина Исламбекова.

Естеріңізге сала кетейік, Бразилияда өткен World Boxing Әлем кубогінің бірінші кезеңінде Қазақстан құрамасы жеті медаль иеленіп, жалпыкомандалық есепте үшінші орын алған болатын. Үш спортшы алтын медаль иеленді.

Әлем кубогінің алғашқы алтынын 60 келіге дейінгі салмақ дәрежесінде Виктория Графеева жеңіп алды. Ол төрешілердің шешімімен бразилиялық Ребекка Сантостан басым түсті.

85 келіге дейінгі салмақ дәрежесінде екінші алтынды Сұлтанбек Айбарұлы иеленді — ол да төрешілер шешімімен бразилиялық Кауэ Белиниден басым түсті.

Әйелдер арасында 80 келіден жоғары салмақ дәрежесінде Валерия Аксенова да алтын алды — ол венгриялық София Сзираны 5:0 есебімен тас-талқан етті.

Қазақстан қоржынына күміс жүлдені 65 келіге дейінгі дивизионда өнер көрсеткен Аида Әбікеева салды. Қола жүлдені әлем чемпионы Алуа Балқыбекова (51 келіге дейін), сондай-ақ Жібек Жарасқызы (80 келіге дейін) мен Диас Молжігітов (80 келіге дейін) иеленді.