Бокстан қазақстандық әлем чемпионы інісі үшін қызметінен бас тартты

Әлем чемпионы Мерей Ақшалов Қазақстан бокс федерациясының (ҚБФ) бас хатшысы лауазымынан не себепті кеткенін түсіндірді. Оның айтуынша, бұл қызмет інісі Мейірім Нұрсұлтановқа көмектесуіне кедергі болатын еді, деп хабарлайды Tengri Sport.

Еске сала кетейік, бұрынғы боксшы ҚБФ бас хатшысы лауазымын 2025 жылдың қаңтарынан 16 маусымына дейін атқарды. Қазіргі уақытта ол федерациядағы жұмысын вице-президент лауазымында жалғастырып жатыр.

"Бұл өзім қабылдаған шешім. Федерация басшылығы қолдады, ақылдастым. Өйткені, өздеріңіз білесіздер, тамызда Мейірім Нұрсұлтановтың әлем чемпионы атағы үшін жекпе-жегі жақындап қалды. Ол артымнан ерген жалғыз бауырым, салмақ қуу бар, жекпе-жек жақындаған кезде қасында болуым керек.

Бас хатшы болсам мен шыға алмаймын, қол қою керек, жиналыстар бар, жұмыс көп. Өздеріңіз білесіздер, Геннадий Головкиннің қасында өмірбақи Максим Головкин болды, сол сияқты Мейірімнің қасында да бір адам жүруі керек", - деді ол Бірінші бол подкастында.

Ақшалов 2008 жылғы Олимпиадаға қатысқанын, ал 2013 жылы елімізде өткен Әлем чемпионатында жеңіске жеткеннен кейін 2016 жылғы Олимпиада қарсаңында ұлттық құрама көшбасшыларының бірі саналғанын еске сала кетейік.

2014 жылы ол денсаулығына байланысты спорттық мансабын аяқтауға мәжбүр болды.

Нұрсұлтанов WBC титулы үшін бақ сынайды

Мерей Ақшаловтың інісі Мейірім Нұрсұлтановқа келетін болсақ, қазақстандық боксшы сәуірде WBC нұсқасы бойынша орта салмақта чемпиондық жекпе-жек өткізу туралы келісімшартқа отырды.

Ол бұған дейін екі рет бас тартылған АҚШ визасын алып, қазір жекпе-жекке дайындалып жатыр.

Бұл ретте 32 жастағы боксшы кейінгі рет шаршы алаңға 2023 жылы шыққан болатын, сол кезде ол төрешілер шешімімен Хулио Аламосты жеңген еді.

Нұрсұлтанов бірнеше жылдан бері WBC титулына міндетті үміткер, алайда чемпион онымен жұдырықтасудан бас тартып келеді.

Бокстан қазақстандық әлем чемпионы жаңа қызметке тағайындалды