“Бірден кешірім сұрады“: қазақстандық клубтың ойыншысы тепкен доп кішкентай жанкүйерге тиіп кетті

Фото: instagram.com/jenisfk.kz

Семейлік "Елімайға" қарсы матч кезінде елордалық "Жеңіс" клубының грузиялық жартылай қорғаушысы Лука Имнадзенің тепкен добы трибунадағы балаға тиіп кетті, деп хабарлайды Tengri Sport.

ҚПЛ-дың 20-турындағы елордалық "Жеңіс" пен семейлік "Елімай" арасындағы матч кезінде оқыс оқиға болды. Астана клубының грузиялық жартылай қорғаушысы Лука Имнадзе шабуыл кезінде допты тепкенде, ол трибуна жаққа ұшып кеткен. Доп кішкентай жанкүйерге тиді. Матч аяқталған соң футболшы трибунаға жақындап, баланы құшағына алып, одан кешірім сұрады.

Instagram-дағы бұл жарияланымды көру

"Жеңіс" футбол клубының (@jenisfk.kz) жарияланымы

Tengri Sport тілшісі бұл оқиғаның қалай аяқталғанын білу үшін "Жеңіс" клубына хабарласты. Клубтың баспасөз хатшысы футболшының тепкен добы балаға тиіп кеткенін басында байқамағанын, бірақ бұл туралы естіген бойда Лука Имнадзенің кешірім сұрау үшін стадионға қайта жүгіріп шыққанын айтты.

"Луканың өзі бұл туралы білген жоқ. Ол трибунадағы балаға доп тигенін көрмеді. Команда сәл көңілсіз болып, бірден киім ауыстыратын бөлмеге бет алған еді. Ойыннан кейін олар трибуна астына бара жатқанда, мен оған бұл жағдайды айттым. Ол бірден жүгіріп барып, кешірім сұрады", - деді "Жеңіс" клубының баспасөз хатшысы Ғалымжан Мұқатов Tengri Sport-қа берген сұхбатында.

Сондай-ақ ол клуб әкімшілігі қазіргі уақытта баланы келесі матчке шақырып, арнайы сыйлық табыстау үшін оның отбасын іздестіріп жатқанын мәлімдеді.

Еске сала кетейік, "Жеңіс" пен "Елімай" арасындағы кездесу 0:0 есебімен тең аяқталды. Қазіргі таңда семейлік ұжым 28 ұпаймен ҚПЛ турнирлік кестесінде 6-орында тұр. Ал елордалық клуб 23 ұпай жинап, 8-сатыға жайғасқан.