+7 (777) 001 44
99
Қазақстандық атлет Азиядада 42 шақырымдық қашықтықты жүріп өтіп, спорттық жүрістен өткен жарыста жеңіске жеткен еді, бірақ марапатсыз қалды.
Оның нәтижесі спорттық аяқкиімінің талапқа сай келмеуіне байланысты апелляцияға берілді.
Қазақстанның Жеңіл атлетика федерациясы оқиғаның мән-жайын түсіндіріп, спортшының Ойындардың басқа чемпиондарымен бірдей көлемде сыйақы алатынын мәлімдеді.
"Біз үшін Ясмина — чемпион. Федерация оны әрі қарай да қолдай береді. Біз жолдаған наразылық пен шағымның қаралу нәтижесіне қарамастан, чемпионға қарастырылған барлық сыйақы төлемдерін федерация өз қаражаты есебінен толықтай жүргізеді", - деп мәлімдеді федерациядағылар.
Бұл ретте ЖАФ нәтиже үшін күресті жалғастырып жатқанын және наразылық білдіргенін айтты.
"World Athletics рұқсат берген аяқкиімдер тізімінде ASICS маркасы көрсетілген. Дегенмен, Ясмина киіп шыққан нақты аяқ киім моделі бұл тізімде болмаған. Сонымен қатар, жарыс басталғанға дейін спортшының аяқкиімі тексеріліп, оған стартқа шығуға рұқсат берілген. Осыған байланысты Федерация Ясминаның құқықтары мен мүдделерін қорғау жұмыстарын жалғастырады.
Бұл ретте федерация өзінен жауапкершілікті алмайды. Спортшыны сапалы дайындау мен жарыстағы нәтижеден бөлек, белгіленген регламенттер мен техникалық талаптардың сақталуы, сондай-ақ халықаралық спорт ұйымдарында спортшылардың мүдделерін тиімді қорғау да маңызды рөл атқарады", - делінген мәлімдемеде.
Instagram-дағы бұл жарияланымды көру
Tengri Sport Қазақстанның Жеңіл атлетика федерациясына, Ұлттық Олимпиада комитетіне және Туризм және спорт министрлігіне қалыптасқан жағдайға қатысты пікір алу үшін сауал жолдап, спортшылардың экипировкасының жарыс ережелеріне сәйкестігін тексеруге кім жауапты екенін атауды сұрады.
Бұған дейін ҚР ҰОК Ясмина Тоқсанбаеваның кроссовкасына байланысты Азияда медалiнен айырылғаны туралы мәлімдеме жасаған болатын.
