Давид Лория футбол федерациясынан кетті

Футболдан Қазақстан ұлттық құрамасының бұрынғы қақпашысы Давид Лория футбол федерациясынан өз еркімен кетті, деп хабарлайды Tengri Sport оның әлеуметтік желідегі парақшасына сілтеме жасап.

Ұлттық құрама аңыз ойыншыларының бірі федерация бас хатшысы болып, кейін оған басқа лауазымға ауысу туралы ұсыныс түскен.

Бүгін, 2 маусымда Давид Лория әлеуметтік желідегі жеке парақшасында Қазақстан футбол федерациясындағы жұмысын аяқтау туралы шешімін мәлімдеді.

Маман федерациядағы қызметі кезінде маңызды жобалар іске асырылғанын атап өтті.

"Байсалды басқарушылық тәжірибе жинақталды және қазақстандық футбол алдында тұрған сын-тегеуріндер толықтай қабылданды. Спорт игілігі үшін жұмыс істеуді жалғастырып, жинаған тәжірибемді саламызды дамытуға жұмсаймын", - деп түйіндеді ол.

Айта кетейік, бұған дейін федерацияның бас хатшысы лауазымына аустралиялық Скотт Манн тағайындалған болатын.

Оның ағылшындық "Тоттенхэм" мен өзге де командаларды басқаруда тәжірибесі бар.

Лория ҚФФ президенттігіне үміткер болды, бірақ өз кандидатурасын алып тастады

Еске сала кетейік, Давид Лория 2024 жылғы сайлау алдында футбол федерациясының басшысы лауазымына төрт кандидаттың бірі болған еді.

Сайлауға бір күн қалғанда Қазақстан құрамасының экс-қақпашысы өз кандидатурасын Марат Омаровтың пайдасына алып тастады, ол кейін президент болып сайланды. Осыдан кейін Лория бас хатшы лауазымына келді.

Лория 2022 жылы да ҚФФ басшысы болуға әрекеттенген, бірақ Әділет Барменқұловқа жол берген болатын.

Футболшы мансабына келер болсақ, ол ұлттық құрама қақпасында 46 ойын өткізіп, қақпашылар арасында Қазақстан құрамасы сапында ең көп матч өткізген рекордшы болып саналады.

Футболшы мансабын аяқтағаннан кейін Лория "Астана" футбол клубында түрлі лауазым атқарды, соның ішінде 2021 жылы клубтың бас директоры болды. Екі жыл бұрын Давид Лория спорт менеджерлеріне арналған UEFA Executive Master for International Players (UEFA MIP) оқу курсынан өтті.

Кейін Лория Super Bol жобасында жұмыс істей бастады және Астана футбол федерациясын басқарды. 2023 жылы бұрынғы футболшы мәслихат депутаты болып сайланды.