“Дөрекі жауап берді“ - ҰХЛ жұлдызы Қазақстанның бірінші ракеткасымен арадағы жанжал туралы

Фото: instagram.com/tblightning/

"Юта" хоккейшісі Михаил Сергачёв Қазақстанның бірінші ракеткасы, теннисші Александр Бубликпен арадағы қақтығысының егжей-тегжейін ашып берді, деп хабарлайды Tengri Sport Матч ТВ сайтына сілтеме жасап.

ҰХЛ клубының қорғаушысы Бубликпен танысу тарихы ерекше болғанын айтты. Оның сөзінше, ол 15 жасында таныс қызды теннисшінің интернеттегі балағат сөздерінен қорғамақ болған.

"Қателеспесем, бұл әлеуметтік желілердің біріндегі тікелей эфир кезінде болды. Онда менімен мектепте бірге оқыған қыз және оның құрбысы болды. Саша әлдебір әдепсіз сөздер айтты. Мен оны көріп қалдым немесе біреу маған жазбасын жіберді. Содан оған жазып, тиісе бастадым. Ол да маған дөрекі жауап берді. Мен оған: "Кел, кездесейік, немесе мен саған барайын" дедім. Әрине, ешқайда бару ойымда болған жоқ. Ол кезде жасым 15-те еді. Ол Петерборда, мен Төменгі Камада тұратынмын. Сонымен, интернетте біраз сөзге келіп қалдық", - деді хоккейші.

Кейін бұл хат алмасу ұзақ жылғы достықтың бастауына айналған.

"Ал кейін 19 жасқа келгенімде, ҰХЛ-да ойнап жүрдім. Теннис турнирін қарап отырып, Саша Бубликтің біреуді жеңгенін көрдім. "Түрі таныс екен" деп ойладым. Әлеуметтік желіге кіріп, ескі хаттарымызды тауып алып, оған жаздым. Әрине, бұл өте күлкілі болды. Сөйлесіп кеттік, содан бері жақсы доспыз. Қазірге дейін араласып, хабарласып тұрамыз", - деп мәлімдеді Сергачёв.

Айта кетейік, Александр Бублик бұған дейін бұл оқиға туралы айтқан болатын. Оның айтуынша, қақтығыс бастапқыда жеке мәселеге байланысты туындаған.

"Мен сол жақтың бір қызымен кездесіп жүрдім. Сосын әлдебір себептермен айырылысқан сияқтымыз. Мен "сәнді" едім. Өзімді солай сезінетінмін, әлеуметтік желіде 10 мың оқырманым бар болатын. Содан тікелей эфир өткізіп жатыр едім. Біреу маған: "Сен оңбағансың, қалай дәтің барды?" деген сияқты бірдеңе жазды. Жасым 15-16-да. Мен оған: "Сен өзің кімсің? Ары жүрші" дедім. Болды. Осымен бітті деп ойлағанмын. Біраз уақыт өткен соң, маған "көк белгісі" бар sergach98 дегеннен "сен анандайсың-мынандайсың, шектен шығып кеттің" деген хабарлама келді.

Ал бұл тікелей эфирлер сақталып қалатын. Ол мұны көріп, нағыз еркекше ханымды қорғауға шықты. Сонымен, шамамен осылай болды. Тек бұл қаланың ішінде емес, онлайн режимде өтті. Әрине, ол маған: "Бұл не қылығың?" деді. Мен де оған бірдеңе деп жауап берген болармын. Ол: "Питерге келіп, сазайыңды беремін" деді", - деп бөліскен еді Бублик Карен Адамянға берген сұхбатында.

Михаил Сергачёв деген кім?

28 жастағы қорғаушы Михаил Сергачёв - "Тампа-Бэй" сапында Стэнли кубогін екі мәрте иеленген. ҰХЛ-да 2016 жылдан бері өнер көрсетеді, ал 2024 жылы "Тампадан" "Ютаға" ауысты.

Осы маусымда тұрақты чемпионаттың 22 матчінде оның еншісінде 22 ұпай бар.

Instagram-дағы бұл жарияланымды көру

Mikhail Sergachev-тің (@sergach98) жарияланымы

Александр Бублик деген кім?

29 жастағы теннисші - Қазақстанның ең танымал спортшыларының бірі. Instagram-да оған 1,4 миллион адам жазылған.

Бублик жылды әлемнің 25-ші ракеткасы ретінде аяқтап жатыр, дегенмен жыл басында ол мансабында алғаш рет ATP рейтингінің үздік ондығына кіре алды.

Отбасылық өміріне келер болсақ, Александр 2021 жылы үйленіп, 2022 жылы Василий есімді ұлы дүниеге келді.

Instagram-дағы бұл жарияланымды көру

Alexander Bublik (@bublik) жарияланымы

Бұған дейін қазақстандық аралас жекпе-жек жұлдызы Шавкат Рахмонов еліміздің бірінші ракеткасы Александр Бубликпен кездесіп, көз арбасу (дуэль взглядов) рәсімін өткізген болатын.

Пікірлер