Елена Рыбакина жағажайдағы демалысы туралы айтып берді

Фото: instagram.com/lenarybakina/

Қазақстандық әлемнің екінші ракеткасы, теннисші Елена Рыбакина Уимблдоннан шығып қалғаннан кейін маусымдағы үзілісті пайдаланып, бірнеше күнін жағажайда өткізгенін мәлімдеді, - деп хабарлайды Tengri Sport Канададағы WTA турнирінің баспасөз қызметіне сілтеме жасап.

Қазақстандық теннисшінің айтуынша, ол сәл де болса бой жазып, бірнеше күнін тенниссіз өткізген.

"Біраз демалып қайтқан жақсы болды. Мен бес күндей жағажайда болып, ештеңе істемей, тек тынықтым. Содан кейін өз базама оралып, біртіндеп дайындықты бастадым. Маған осы бес-алты күндік демалыс өте ұнады", - деді Рыбакина Монреальдағы турнир алдындағы баспасөз мәслихатында.

Еске салайық, Рыбакина соңғы матчін осыдан бір ай бұрын Уимблдонның үшінші кезеңінде өткізген болатын. 4 шілдеде қазақстандық спортшы бельгиялық Мертенске есе жіберіп, содан бері кортқа шыққан жоқ.

"Жеңілістен кейін мен Лондонда бірнеше күн қалдым. Уақытымды жақсы өткіздім. Бұл маған алдағы маусымға сапалы дайындалуға көмектесті деп үміттенемін", - деді теннисші.

Турнир алдындағы баспасөз мәслихаты #Rybakina #Toronto pic.twitter.com/W0sPH16Jnd
— rybafan (@rybafan) 3 тамыз, 2026 жыл

Монреальдағы турнирде Рыбакина жарысты бірден екінші кезеңнен бастайды. Қазақстандықтың алғашқы қарсыласы Аустралия атынан сынға түсетін Дарья Касаткина болмақ.

Айта кетейік, қазақстандық теннисші әлемнің үздік теннисшісі атағы үшін беларусьтік Арина Соболенкомен бәсекесін жалғастырып жатыр. Қазір олардың арасында әлемдік рейтингте 500 ұпай айырмашылық бар, алайда Елена былтыр жинаған 325 ұпайын қорғауы тиіс, ал Арина нәтижеге қарамастан ұпай еншілейді.

Соған қарамастан, биылғы маусымда қазақстандық спортшының атақты қарсыласынан рейтингтегі бірінші орынды тартып алуға мүмкіндігі бар.