“Елімай” - “Ордабасы” матчінің төрешісі сотқа тартылды: үкім белгілі болды

Футбол төрешісі Арман Есмұратов "Елімай" - "Ордабасы" матчінен кейінгі жанжал үшін 5 тәулікке қамауға алынды, деп хабарлайды Tengri Sport.

Семей қалалық әкімшілік сотының қаулысына сәйкес, төрешіге Кодекстің 434-бабының 1-бөлігі (қоғамдық орындарда балағат сөздер айту, қорлап тиісу және айналасындағыларға құрметсіздік білдіретін, қоғамдық тәртіп пен тыныштықты бұзатын басқа да осыған ұқсас әрекеттер) бойынша айып тағылды.

Әкімшілік кодекске сәйкес, бұл заңбұзушылықтар үшін 20 АЕК мөлшерінде айыппұл салу немесе 20-дан 60 сағатқа дейін қоғамдық жұмыстарға тарту, не болмаса 5-тен 15 тәулікке дейін қамауға алу жазасы қарастырылған.

Сот 5 тәулікке бас бостандығын шектеу жазасын таңдады. Төреші өз кінәсін мойындамай, оқиға түсірілген видеожазбалардан кімнің балағаттағанын анықтау мүмкін емес екенін алға тартты. Сот Есмұратовтың уәждерімен келіспеді.

"А.Х. Есмұратов қоғамдық тәртіпті бұзып, себепсізден-себепсіз айналасындағыларға менсінбей қарайтынын көрсеткен және өз басымдылығын пайдаланып, қоғамдық тәртіпті анық бұзған.

А.Х. Есмұратовтың әкімшілік құқықбұзушылық жасаудағы кінәсі жиналған дәлелдемелермен, әкімшілік құқықбұзушылық туралы хаттамамен, жәбірленушінің, сотта көрінеу жалған айғақ бергені үшін әкімшілік және қылмыстық жауапкершілік туралы ескертілген куәгерлердің айғақтарымен, видеожазбамен, полиция қызметкерінің баяянатымен және істің басқа да материалдарымен өз дәлелін тапты.

Куәгерлердің айғақтары тұрақты, іс материалдарымен сәйкес келеді және видеожазбамен расталады, бұл олардың шынайылығын көрсетеді", - делінген қаулыда.

Айта кетейік, қаулыға сәйкес, жәбірленуші тарап ретінде төрешінің әрекеті туралы алғашқы болып мәлімдеген жаттықтырушы Андрей Карпович емес, "Елімай" ФК президенті Фёдор Симиниди танылды.

"Балағаттады": жанжал неден шықты?

Еске сала кетейік, жанжал "Елімайдың" бас жаттықтырушысы Андрей Карповичтің баспасөз мәслихатында "Ордабасыдан" жеңілген матчтегі Есмұратовтың шешімдерінің әділдігіне күмән келтіріп, төрешіні қоқан-лоқы көрсетті және балағат сөздер айтты деп айыптағаннан кейін жария түрде өрши бастады.

Әлеуметтік желілерде Есмұратовтың "Елімай" клубының жаттықтырушысы мен президентіне қаратып, маусымның қалған бөлігінде клубты "тұншықтыратынын" айтып айғайлап жатқан видеосы тарап кетті.

Кейінірек әлеуметтік желілерде матчтен тағы бір видео пайда болды. Онда жанжалды бірінші болып жаттықтырушы Карпович бастағандай көрінеді.

Бұл видео жарияланғаннан кейін "Елімай" бапкері оны "фейк" және "монтаж" деп атап, ролик соңында оның төрешіден неге балағаттап жатқанын сұраған дауысы естілетінін алға тартты.

Сонымен қатар әлеуметтік желілерде Симинидидің ойын алдында және ойын күні Есмұратовқа хабарласқанын көрсететін скриншот тарап кетті.

Фото: threads.com

Айта кетейік, оқиға 14 маусымда болған, ал матч 3:1 есебімен "Ордабасының" пайдасына аяқталған еді. Бұл ретте Қазақстан футбол федерациясы матчтің төрелігіне қатысты да, одан кейін болған жайтқа қатысты да әлі күнге дейін ешқандай ресми пікір білдірген жоқ.

Сондай-ақ төрешінің өзі де жағдайға байланысты ресми мәлімдеме жасаған жоқ.

Есмұратов бұған дейін де жанжалға іліккен: ол трибуна астындағы жайда футболшыны ұрған

Арман Есмұратовтың мансабында бұған дейін де тәртібіне байланысты шеттетілу жағдайы болған. 2021 жылдың наурызында "Атырау" - "Шахтер" матчінен кейін рефери трибуна астындағы жайда "Атыраудың" 20 жастағы ойыншысы Сәбит Тастанбековті ұрып жіберген.

Оқиғадан бір жыл өткен соң шеттету мерзімі аяқталып, төреші жұмысына қайта оралды және Қазақстандағы мәртебелі төрешілердің біріне айналды.

Ел ішіндегі жұмысынан бөлек, Есмұратовтың Францияның бесінші дивизионы, Еуропа лигасының іріктеу кезеңі және Астанада өткен Намибия мен Комор аралдары құрамалары арасындағы FIFA Series матчтарында төрелік ету тәжірибесі бар.

Балағаттап, қоқан-лоқы көрсетті: ҚПЛ матчі төрешілер жанжалына ұласты