Балағаттап, қоқан-лоқы көрсеткен: ҚПЛ матчі төрешілер жанжалына ұласты

Бейнеден алынған кадрлар

14 маусымда Семейде Қазақстан чемпионаты аясында өткен "Елім-ай" - "Ордабасы" матчі алаң иелері сапындағы ойыншының даулы түрде алаңнан қууымен аяқталды. "Елім-айдың" бас бапкері Андрей Карпович төреші оның тарапына балағат сөздер айтқанын мәлімдеді, деп хабарлайды Tengri Sport.

14 маусымда Семейде Қазақстан чемпионаты аясында өткен "Елім-ай" - "Ордабасы" матчі алаң иелері сапындағы ойыншының даулы түрде алаңнан қууымен аяқталды. "Елім-айдың" бас бапкері Андрей Карпович төреші оның тарапына балағат сөздер айтқанын мәлімдеді, деп хабарлайды Tengri Sport.

Карповичтің айтуынша, оның және төрешінің арасында жағымсыз сөз алмасу болып, соңы ашық қоқан-лоқыға ұласқан.

"Осы уақытқа дейін бапкерлермен және ойыншылармен бұлай сөйлескенін көрген емеспін, бас төреші Ісмұратов мені кәдімгідей мені балағаттады. Ол бүгінгі әрекетімен бүкіл облысымызды, стадионға келіп жанкүйерлік еткен, уайымдаған барша жанкүйерлерді қорлады.

Сондай-ақ ол чемпионаттың қалған жартысында "Елім-айды" тұқыртумен болатынын айтты. Жеке өзімді де аямайтынын жеткізді. Бас төрешімен болған әңгіменің мән-жайын түсінгендеріңізді қалаймын. Бұл нағыз тағылық. Егер ол менімен есептескісі келсе, мен кез келген уақытта дайынмын. Бірақ абайламаса, өзі де опық жеп қалуы мүмкін", - деді бапкер баспасөз мәслихатында.

Ойынның нәтижесіне келер болсақ, матч 1:3 есебімен Шымкент командасының пайдасына аяқталды. Кездесу барысында төрешінің қатысуымен бірнеше даулы сәт болып, соңында ол Жан Әли Пайрузды еш түсіндірместен алаңнан қуып жіберген.

"Алдымен ол бапкерді балағаттады. Мен жай ғана, байсалды үнмен "неге балағаттайсың?" дедім. Маған да қызыл қағаз көрсетті. "Не үшін?" деп сұрап едім, ешқандай түсініктеме бермеді. Тек "бұл жерден кет" деп, үстіне сүйікті балағат сөздерін қосып жатты", - деді футболшы.

Матчтегі даулы кадрлар әлеуметтік желілерде тез тарап, "Елім-ай" жанкүйерлерінің де, бейтарап көрермендердің де қызу наразылығын тудырды.

Әлеуметтік желідегі бұл резонансқа матч өткен Абай облысының әкімі Берік Уәли де үн қатты.

"Осы мәселеге байланысты өңір өкілі Қазақстан футбол федерациясының президенті Марат Омаровпен сөйлесті. Федерация басшысы жағдайдың мұқият қаралатынын, арнайы комиссия құрылып, мәселе түпкілікті шешілетінін мәлімдеді. Берік Уәли әділдік жолындағы ұстаным өзгермейтінін атап өтіп, бұл мәселені жеке бақылауында ұстайтынын жеткізді", - деп хабарлайды жергілікті жаңалықтар порталы.

Қазақстан футбол федерациясы қазіргі уақытқа дейін бұл мәселеге қатысты ресми түсініктеме берген жоқ.